微博文化其實很有趣也很沒趣，任何人任何時候貼個笑話出來，不管好笑與否，一律會被人說成「冷」，發張照片上去呢，無論有沒有裝可愛的動機，統統被不問情由冠以「賣萌」的可恥罪名。
這種逢笑話必「冷」，逢照片皆「萌」的人云亦云，其實相等於香港人一見人唔笑就一定屈人「chok」，對，笑就是「萌」不笑就是「chok」，喂大佬，畀條生路嚟行吓好喎！
所以呢，趁着是真正「冷」的挨年近晚派對季節，不「萌」白不「萌」，不如就把握這個奉旨扮靚的時機，大家一齊「chok」到爆吧，反正你不chok人家也必屈你chok，入場費已付，咪蝕底囉！
聖誕Party穿甚麼？
如果女性分娩假期有「前4後6」，我覺得聖誕節也不應只得「翌日」才有天供人休生養息的holiday，其實平安夜之前才更應該法定幾日「紅日」，一年最忙死人的，應該就是那幾天吧，一來又要趕貨趕工埋年結，二來又得四出為你愛錫的親朋（與被迫愛錫的客戶和工作夥伴）張羅聖誕禮物，而且最慘的是，末了你才醒起還沒有預備好去party的造型……哎呀，我真係好唔想再求求其其戴頂聖誕老人帽去party就當自己扮咗靚應咗節囉！
所有「過來人」都知道，一個女人去ball或大型party前的準備工夫絕對是一份fulltimejob來的，我們先不要說「撲」衫了，就當你已經知要穿甚麼，你還得預備相襯的鞋子、手袋和首飾呀；如果天氣冷又要搵多件match到嘅褸或者披肩呢；化妝髮型都要安排啩？着晒靚衫但丫烏咁嘅頭去salon整吖？還是先去set頭化妝成個飲樣不過運動衫牛仔褲咁坐車返屋企換衫呢？如果今晚套衫要露肩或背我諗你兩個星期前都咪食「熱氣嘢」了吧？就算甚麼都不露只見小腿，一樣要心水清到當日下晝已做個「不着襪的人」，否則出門口前先見到有紅色「襪印」的話，馬上狂搽lotion都消滅唔切啦！全身上下要打扮妥當之餘，還得預先想想這個造型到底是不是適合坐公共交通工具？如果不還要book定車或call的士，想費事煩自己揸車又要考慮改道，泊車的問題，咪先咪先，今晚你飲唔飲酒先？……真係諗起都煩！而且你還記得嗎，當初我們還跳過了一個「核心問題」未處理呢？
究──竟──今──年──聖──誕──Party──着──乜──嘢！
男人的感慨
女人去party好煩，煩在太多選擇，也太多東西要預備。但男人去party其實都煩，煩在冇乜選擇，一收到dresscode是「BlackTie」的請帖便開始頭痛，一樣是「黑munmun」的一件褸一條褲，到底要襯怎樣的煲呔、鞋子、飾物才能令人看得出你今年的look和去年、前年、大前年、大大前年是有一點點分別，並不是同一套衫冇換過呢？
每一個「進取」的派對賓客都積極求變吧？得「試新嘢」雖然帶來興奮，但也會惹起不安的，問題就是：「到底如何保證我這個『新嘢』是試對了的呢？」
揀見人最多收視率最高的日子才「瀨嘢」咪好大鑊？
派對的錯
我有位時裝設計師朋友，話說那是一個家長日──他的父母和他男朋友的父母要第一次碰面吃飯了，所以前一天晚上他收到這麼一個電話，原來是他媽媽求救：「請問我明天穿甚麼才對呢？」正要回答之際，聽筒裏傳來callwaiting的訊號，「這麼夜還有誰打來呢？」他正感到奇怪，惟有叫媽咪等等先接聽一下來電吧。「喂……」原來另一條線上是他bf的母親：「請問我明天穿甚麼才對呢？」
據說我這位朋友的媽咪及岳母平日都是很會穿衣服的人，為甚麼還要問別人意見呢？
其實根本沒有人真正需要別人的意見啦，只不過「問意見」本身就是一個替人「減低不安」的好方法，我想說的是，如果在重要派對前你不是很sure自選的那套衫夠不夠好看，不妨多向幾個friend「問意見」，他們贊同你的品味與否不是重點，重點是你和多幾個「活人」討論一下才出門，你會有多些「信心」的。
而「信心」，就是在派對「勝出」的關鍵！事情根本就是這樣，只要你夠大膽，就能把懷疑你的旁人「大」走！就算大不走，也不要畏縮示弱，因為那種姿勢是最肉酸。
你要懷疑自己就在家裏懷疑吧，一出門口你就要挺起胸膛頂硬上，就算今日的造型你覺得顯肥顯瘦，領口太低裙子太短，天氣不對或者over/underdress了，你現在也只能愛你手上身上僅有的那個look，大大方方地展示你的戰衣吧，時裝世界和做人其實一樣，請記住這口訣：「很有信心的錯就是對！」
想起一個有趣的反面教材，真人真事，最近去了個朋友辦的party，某位女賓頭上戴了個MaisonMichel的喱士兔仔頭飾，她還特地自己加工在上面貼滿blingbling的水晶。到場之後她看看其他賓客的打扮，大概也自覺這造型太浮誇了吧，於是飯吃到一半她粒聲唔出便失蹤了，半小時後她從洗手間出來時，頭上的headpiece便忽然不見了，clutchbag的一角卻夾着一小片黑色喱士凸了出來。
各位同學，大家挺起胸膛出發去X'masparty之前，請跟我一齊大聲朗讀今天的Notes：1-2-3-：「很有信心的錯，就是對！」
祝大家聖誕快樂！
Textby黃偉文
填詞人，其實最鍾意買嘢，最憎寫字，星期日盡可能唔寫字，去買嘢。
mailto:[email protected]
http://t.qq.com/thewymanwong
微博 http://t.sina.com.cn/wymanwong
本欄逢星期日刊出
