小圈子選舉，似乎很討人厭，但昨晚一班講波佬卻自己搞了一個，結果玩得不亦樂乎。
話說一班來自不同媒體的講波佬和講波妹在5年前為了多一個理由聚頭，所以很認真的成立了足球評述員協會，這些年來，活動不少、友賽更多、書也出了一本，但每年最重要的聚會，還是臨近聖誕這一餐晚宴了。
協會人少少，還差二三十個才有100人吧，但比起20年前才10隻手指數得晒的講波佬，今天的數字當然很驚人，但由於講波佬們都是全天候24小時隨時oncall，所以要擇個好日可以讓最多會友能夠共聚一堂，其實頗費周章。早在個多月前大家就集齊各大小聯賽賽期，再參考埋各大小頻道的開工時間，複雜程度拍得上睇通勝選婚期。結果人算還不如天算，昨晚一宴還是巧遇歐聯抽籤、旺角場打吡，以及一連串的錄影節目，所以原本的4席惟有改為兩圍。人少了，不過還是過節暖笠笠。正如有些朋友總是很難約，不過見到面就立刻可以雞啄唔斷，是為我們這一行的寫照。
舊朋友聚舊，也有新朋友加入，TVB體育組話事人Patrick及前ATV型男袁文傑也來趁熱鬧，實屬意外驚喜。
講番我們的小圈子選舉，為了互相鼓勵同業們的付出，所以今年小試牛刀試辦了互選的「我最愛的講波佬」，結果在一人可以投三個之下，總共有21位會員得到選票，可見各有各擁躉。
而最後三甲結果係……登登登……第3位，PeterWong黃興桂！名字一公佈，一時席間金句此起彼落，只可惜Peter真身返了新加坡，否則應該會有新金句面世！第2位……「大哥瑜」蔡育瑜！大哥瑜多年來以斯文淡定見稱，今番攞獎照舊老定，唯獨笑容誇張，令眼尾的魚尾紋更見魅力！第1位……李德能！嘩開心囉，德能兄直頭係跳出來攞獎，雖然西裝打扮，但骨子裏德能根本就係大細路，甚至係壞細路，希望貝生冇發現佢酒樓有座水晶燈少咗兩粒水晶啦，多得我同德能飯前的射籃大賽囉！
小圈子有小圈子的樂趣，下季不如加多幾個獎，例如最佳新人呀、最佳講波妹呀等等，到時，要搵埋堅哥頒獎！
文：keyman