成日發怪夢，起身又周身痛？香港淳道玄學總會會長方海閱同大家講咁好可能同你間房的風水有關！
記者：陳家蕊
攝影：譚盈傑
Model：Kitty@GME
花天花地 歐陸風
元朗錦上路的三層別墅式歐陸花宅，由屋主練小姐用150萬打造：「我好鍾意歐陸田園感覺，而屋外又有花圃，所以就用花去做主題，仲可以對屋外環境有一個延伸感覺。」的而且確，除咗所有的家品，房的牆身都有花的圖案，絕對是一間花天花地的花宅。屋內大型傢俬，都係由屋主自己精心設計挑選；練小姐很喜歡到泰國搜羅復古傢俬，愛它的手工精緻，而價錢又合理。她對四季酒店的直立式復古風扇情有獨鍾，在泰國找到同款的都只需$1,500港元。
全屋的木製家品，差不多都是由泰國的木工廠訂製，其中一張歐陸式復古梳化椅，由選木到選色，練小姐就特地三次飛到泰國，才做出心水的樣式。屋入面大至梳化，小至水龍頭，每一樣都充滿歐陸氣息，再配合廳外的私家花園，以及屋外清幽的環境，真係以為自己置身歐洲田園一樣！
以前住喺港島區的練小姐覺得：「之前住那裏，樓上樓下，365日都喺度裝修，家喺度住，幽靜的環境令成個人都放鬆哂！」
四面環山 可聚寶
唔單止間屋靚，方師傅睇過間屋，見到環境四面環山，就好似一個聚寶盆咁，有聚財的效果，風水都真係唔錯。但係見完屋入面的睡房，方師傅就話屋主犯咗三個睡房風水禁忌！
屋主的所有房間的頂燈都採用歐陸式吊燈，靚就好靚，但係就弊在統統都喺正張床對上，即係壓住張床，咁樣會對睡覺的人健康有壞影響，例如盞燈壓住的位置係你對腳，咁好可能你就會腳痛。另外方師傅發現屋主客房的床頭原來沒有床背，就是沒有靠山的意思，會令人發埋一些無無謂謂的夢，影響到睡眠的質素。
最後就係屋主喺床尾有張靚靚梳妝枱，一起身就對住大大塊鏡亦都會影響精神，望到好容易會出現幻覺，方師傅話最好瞓之前就搵塊布遮一遮。其實睡房係俾人休息放鬆的地方，無啦啦原來犯咗風水禁忌影響精神同健康就唔好啦！
方師傅又透露咗2012年財位，原來在西面，咁啱屋主的書枱就放在西面，在財位上處理工作文書，生意就會更暢旺。另外相信好多讀者都想知道如果2012年想增強財運，喺風水上面又有咩簡單的方法呢？方師傅教路：「好簡單，只要喺屋的中央，擺放一隻金馬，自然就趨財，又有利升職。」
指指點點賴嘢位！
