上集俾Fans狂鬧「一本道」（單一劇情、單一走向），無RPG探索味道，嚟到續作，SE痛改前非，地圖又大又多，食埋《回到未來》橋玩穿梭時空，來來回回不斷改寫劇情，沿路仲要收服怪物做，再細心呵護當寵物咁培養，爆機工程浩大。想100%Clear攞白金盃，睇怕呢個聖誕假你都唔使約人去街囉。
記者：徐影龍
痛毆完再扮Friend
《FF》就像荷李活A級特技片，華麗有餘但往往內涵不足，近年流失不少Fans，始終《FF》1-7集實在太經典了。《FFXIII-2》未推出已被《FAMI通》評出40分滿分，算係為Fans打咗支強心針，事實上SE今勻的確落足重藥，將最受歡迎元素砌晒入隻Game。先唔講劇情同畫面，單單從第二時空AF005年開始，已可收服怪物入隊，再不斷餵食道具培養升呢，已算《FF》一大突破。怪物隊友五花八門，有攻擊、魔法高手，又或回復類，比固定主角更多姿多采。
不過筆者打RPG，頗抗拒收集怪物系統，因為永遠都有更勁怪物出現，平白浪費「供書教學」苦心。幸好今集收怪系統加入繼承概念，就算星盤升到Lv99學到嘅必殺技，亦可延伸到下一隻更勁嘅怪物度，真係「養兒九十九，唔怕佢會走」！讓身邊怪物變成寵物，毋須人道消滅咁浪費，唔使再停一停、諗一諗喇。
想贏大佬要識攻
都話新作集天下之大成，養怪系統似足《DQ》加《真女神轉生》，更加入《Uncharted》即時按掣做反應嘅QTE系統，連一開波已出現Lightning大戰混沌龍王嘅高潮劇情，亦好有《戰神3》影子。當然，高清靚畫面、dts5.1音效、收集服飾、定時有DLC下載等，亦屬Game界潮流玩意。唔同嘅機迷，總會找到喜歡《FFXIII-2》嘅理由。
上集《FFXIII》幾一本道都好，玩擺陣嘅戰鬥實在好正，嚟到Part2，戰鬥無大變化，老手當然EasyJob，不過新玩家會有「攻極唔入」嘅初哥問題。其實敵方除HP計，仲有個Break計，通常Blaster嘅遠攻魔法，係最有效打滿敵人Break計，破防後己方Attacker便可達至200%甚至999%攻擊，對付難搞Boss，一定要識「邊打邊破防」嘅概念。
《FFXIII-2》
機種：PS3/XB360
類型：角色扮演
人數：1人
開發：SquareEnix
售價：約$439
