趙薇及林嘉欣等前晚在圓方出席鑽飾店開幕，兩位媽咪級影星各自戴過千萬鑽飾，一見面就拖手傾湊女經，剛做酒莊女主人的趙薇，自言重視工作，女兒在她心目中僅排第三、四位，相反，嘉欣女兒大過天，就算與女兒分開一天都感難受。
趙薇及林嘉欣前晚出席DeBeers鑽飾圓方新店開幕，名模Rosemary和姚予晴（Mikki）示範鑽飾。趙薇早前和老公買了一間法國酒莊，對此她開心說：「當酒莊女主人感覺不錯，很喜歡酒的文化、味道和歷史，覺得很浪漫！」
趙薇想女兒樸素
趙薇早前狂推戲，瞓身籌備自己首次執導的愛情新片，她說：「還沒找到女主角，我想要年輕、漂亮、可愛，又懂演戲的。」為拍片，趙薇也兼顧不到女兒：「女兒排第三、四位吧，我很重視工作，聖誕節是開機前唯一機會，會好好慶祝。」她又謂不想女兒收鑽石做禮物，想女兒樸素點。
林嘉欣前晚少有悉心打扮示人，她笑言有出嫁的感覺，一講到囡囡，嘉欣即滔滔不絕：「囡囡14個月大，成日叫媽媽，不過老公冇呷醋。」她坦言和囡囡分開一天都難受：「試過去北京做嘢，好想即日返，但問過全部航空公司都冇夜機，惟有搭第二朝最早嘅6點機走，冇見得耐就心急！」
問嘉欣可想追生龍B？她說：「想再生，但家冇計劃。」嘉欣又說接了舞台劇，問她可想女兒入行？她指童星入行超辛苦，不想囡囡捱。
姚予晴婚前分手
另外，姚予晴和男友Sunny原定下年結婚，前晚卻驚爆分手：「一個月前因了解而分開，同第三者冇關。」她坦承籌辦婚禮時，令兩人之間的問題浮現：「籌備期間有好多問題同矛盾，大家對婚姻嘅睇法唔同，對未來冇共同目標。」結束十年感情，Mikki說有喊與不捨，但與Sunny仍是朋友。採訪：盧妹
攝影：黃文偉