陳嘉桓（Rose）上月遭賤狼陳浩民和馬德鐘非禮，馬德鐘一早甩身，一直被冼國林咬住唔放的陳浩民，昨日登報道歉及捐錢去護苗基金，終獲冼師傅、Rose及其母Ronnie原諒。冼師傅昨日開記者會表示已終止一切法律追究行動，浩民亦鬆一口氣，重返案發地橫店開工搵銀。
陳嘉桓被抽水事件發生近一個月，昨日陳浩民主動在中、港兩地登報道歉，又承諾捐錢往慈善機構。冼國林昨日在觀塘辦公室召開記者會，臉帶笑容表示接受浩民的道歉：「上次佢（指陳浩民）道歉後，透過唔同嘅朋友向我哋提出意見，叫佢喺香港同內地一份報紙登報道歉，還Rose一個公道，內地登報紙要本人去登同有律師在場，知道佢有呢個舉動，好有誠意。佢捐錢去護苗基金，Rose同Ronnie都覺得好有意義，護苗基金係幫弱小女士，反映到陳浩民知道要自我警惕，得饒人處且饒人，佢家勇敢認錯，我哋完全接受。」
登搜尋榜首
冼師傅稱從沒提出任何要求，剛巧昨日是到內地報公安的最後限期：「我哋會停止所有法律行動，喺香港銷案。」他透露Rose已飛到雲南拍戲，亦不介意將來兩人合作。Ronnie則向傳媒發短訊說：「事件已由冼師傅代為妥善處理，我同陳嘉桓完全同意冼師傅的決定，亦都好開心可以還我兩母女一個公道，我們同意不再追究，讓陳嘉桓及早回復工作。」
陳浩民昨已返回橫店為新劇《濟公3》進行開鏡，其經理人林查理說：「啱啱打畀佢（陳浩民），佢都好開心，感謝冼師傅同嘉桓寬宏大量，浩民覺得好安慰，亦會引以為戒。」問到登廣告及捐款花費多少錢？他說﹕「總之多謝傳媒一路咁辛苦。」此外，陳浩民和馬德鐘的雙狼事件登上Google「2011年度十大娛樂熱門人物/話題搜尋排行榜」首位。
另外，樂易玲昨日到旺角出席活動時說：「咁咪好囉，和氣生財、發財立品，呢個圈大家守望相助，作為前輩要做好榜樣畀年輕一代。唔好因為一時輕狂，傷害自己前途。家圓滿結束，大家重新振作。」
採訪：胡比
攝影：林德雄