食得甜品多是否零舍口甜舌滑，不得而知，但無綫節目《甜姐兒》主持糖妹和美味天使丁樂鍶卻變得春心動，感情空白的兩女受幸福潮媽徐淑敏（Suki）感染，也有趕嫁衝動。三女滔滔不絕交流媾仔經，糖妹自爆要出擊力追台灣帥哥柯震東。
撰文：比華利
無綫近日安排甜到漏的咪神徐淑敏、糖妹和美味天使中的「腸粉」丁樂鍶主持新節目《甜姐兒》，上周首播，觀眾看三女介紹甜品，守在電視機旁都睇到流口水。其實鏡頭後的三位80後甜姐兒首次合作，大家無所不談，火速變好姊妹。甩拖糖妹和從未戀過的丁丁，看見Suki每天開工後都盡快趕回家做賢妻良母，幸福家庭源源提供正能量，糖妹和丁丁均羨慕不已，兩女上腦，決意急起直追，不排除效法Suki閃婚和火速生B。
徐淑敏達標心滿足
事業和家庭兩得意的Suki，每事都得心應手，她不諱言已達成入行目標說：「我入行一直都想嫁，家有老公又有兩個女，有幸福家庭，真係好滿足。」相對來說，正冒起上位的糖妹才24歲，甫出道已給高登網民、宅男力捧為女神，她當然想在演藝事業有一番大作為，但同時糖妹坦言都想得到愛情滋潤，以平衡工作壓力，所以一旦遇上心儀對象，糖妹說：「我次次都會主動出擊，我過往嘅男朋友都係自己追番嚟，我鍾意自己揀多過等人追，俾人揀，咁樣好被動。」
丁丁鍾情台灣嫩男
講到擇偶，糖妹自爆情迷由台灣爆紅到香港的柯震東，一提到男方，她的「芥菜樣」即毫無保留彈出粉臉上，糖妹大讚夢中情人說：「我狂迷佢，佢除咗生得帥，個人又好有幽默感。」現年23歲的丁丁本來也想選柯震東做心儀對象目標，她未開腔，糖妹已出言恐嚇，並搞笑說：「我要追嘅話，出手一定追到，你咪同我爭。」當然糖妹戀上柯震東着實有難度，但娛樂圈是圓的，糖妹下月也到台灣工作，說不定二人真的有緣擦出港台長短腳之戀。
丁丁見狀惟有轉軚說：「咁我揀汪東城啦，我睇台劇，超級鍾意佢，因為佢好搞笑。我鍾意男仔對女朋友好體貼，我份人好怕用腦諗嘢，如果有男友將我照顧得妥妥貼貼就最好不過。」
糖妹自薦怕變剩女
Suki自從跟糖妹和丁丁相處後，也聽過她們對另一半的要求，兩女有信心Suki可以為她們做媒，讓她們早日圓出嫁夢，脫離剩女行列，Suki眼睛一轉便說：「唔……我手頭上都有人選好啱丁丁，丁丁係好多男仔鍾意嘅類型，因為佢性格好柔，好多男仔鍾意俾女朋友依賴。佢EQ好高，笑起上嚟好sweet，係搶手貨。」
性格爽朗活潑的糖妹深怕被丁丁爬頭拍拖，屆時變剩女，糖妹馬上賣口乖：「其實我都好善解人意，喺男友面前，我唔會咁牙尖嘴利，會變鵪鶉。我本來事業心好強，不過見到Suki有自己個幸福家庭，搞到我都想快啲生仔。」場地：香宮（九龍香格里拉大酒店）
糖妹耳穴減肥
三位甜姐兒在短短個半月內，每天不停四出拍外景尋寶，鏡頭前後，她們對美味甜品又無力抵抗，結果腰間長了不少贅肉。身形的骰的糖妹說：「我個重災區喺肚腩，日日走勻幾間食肆，每間又食幾款甜品，你話點會唔肥？」深怕未拍完節目體形便向橫發展，糖妹醒目已開始耳穴減肥，她的耳窩放了膠粒，她說：「一個台灣嘅醫師幫我放上去，原理好似磁貼一樣，佢可以控制我身體嘅吸收。」
丁丁有恃無恐
Suki講笑謂狂吃甜食，最怕會出現糖尿病後遺症，她說：「我做完節目要去驗身，最失敗係次次一肥，先脹喺塊面，上鏡大忌。」丁丁則有恃無恐說：「我覺得家減都冇用，我索性先放縱，拍完晒先節食狂減。」
師姐秋後算賬兼評分
徐淑敏06年選港姐入行，在無綫磨練兩年便獲派擔大旗主持飲食節目，產後復出的她近日領軍糖妹和丁丁主持飲食節目《甜姐兒》，相對兩位小師妹，師姐Suki表現自然稍勝。
「開工冇打招呼」
三女首日開工，不熟絡下氣氛拘謹，Suki扮嬲秋後算賬：「佢哋第一日開工冇同我打招呼囉。」丁丁解釋論資排輩最低，最初開工盡量少說話。正因為丁丁的過份低調，她們開拍前開會爆出笑話一場，Suki說：「我接通知明明係三位主持，現場只見糖妹在座，一直搵緊邊個係第三位，其實丁丁一直喺我隔籬，我就誤會佢係靚女工作人員。」
大師姐Suki給小師妹評表現，她說：「糖妹作為新人有85分，佢主持時加好多自己意見，精到甩轆，活潑又聰明，糖妹好有觀眾緣。」糖妹聽後笑到見牙唔見眼。糖妹表現出色，丁丁的臉上即現壓力，Suki說：「丁丁就70分，我建議佢對鏡頭笑多啲，因為佢唔笑好惡。」
