珠寶龍頭股上市首日失威，淡市「深海潛水」，掌舵人在儀式後急步離開，還好開國老臣子仍肯向記者醒兩句「有人亂世出世，有人盛世出世」；其實講多無謂，是龍是蛇，假以時日，必恍然大悟，今周重心捧紐卡素主場掃低史雲斯，望締本欄3連勝。
紐卡素永遠係充滿激情嘅東北第一大會，面對肥佬老闆艾殊利玩寸派對，球迷仍唯唯諾諾，去年同月炒了近數10年在任時期勝出率最高、帶領他們重返英超嘅領隊曉頓，換上一位常打護級戰、管治能力充滿爭議嘅領隊柏度，大家以為老闆又搵傀儡。今季也激，趁球會勢好，球迷心情好，唔覺意連老字號聖占士公園球場個招牌都拆埋，轉名賺一筆；死忠球迷以往見球隊降班，怨氣也不多，球會現時成績好，聲勢更響。
柏度亂世出世，初擔大旗時做了數周，老闆即狠放走王牌安祖卡路爾，在上次歇冬轉會期時高價賣給利記。但馬後炮說句，今天仍能排喺第7，一眾套現後買入的平實新兵起了重要作用，尤其只以幾百萬鎊買入的法國國腳中場卡比耶最好，丹巴巴亞唔使轉會費更筍；季初勇猛近期轉沉只因所遇對手屬頂級，而上次大敗給小弟認為最勁升班馬諾域治，只因雙中堅齊缺被對手轉數快用高空轟炸炸死。連今場迎戰史雲斯，年尾最後兩場還有對西布朗（主）及保頓（客），賽序大利反彈，搶到9分，取前6在今年埋單在望；對手從西南部北上，難望踢回上仗氣走富咸嘅氣勢，紐記賠率降溫，反屬今周主W穩膽。
英超周末夜場起至周日上演強隊5連環，守尾門係曼城鬥阿仙奴，大部份人唔信阿仙奴現時守力擋得住曼城火力，尤以防線缺雙閘，又怕梅迪薩卡被巴洛迪利或者迪斯高硬爆；一向受丘仔批評的梅迪薩卡近期表現似回穩，賽前叫外界"Judgemeafteraseason"，我也不信華美倫移任左閘後，這位德國中堅與哥斯尼可擋得住對手中路火力；不過阿仙奴從來無懼同對手鬥攻，「入球大」熱也穩開，再博兩個「其他」波膽，且看亂世出世、火速加盟阿仙奴的梅迪薩卡，能否讓大家繼續跌眼鏡，再踢爭氣波！
下次見報(21/12)
文：蘋果波神
今日
重心推介
熱選：紐卡素勝（1.75）
冷選：曼城勝主其他（28）、阿仙奴勝客其他（100）