名模Angelababy（楊穎）早前接拍台灣電影《痞子英雄首部曲：全面開戰》嘅時候，已經經常請假缺席，而且好多鏡頭，特別係吊威吔嘅戲，佢都要用替身。近日又有傳Baby去台灣宣傳，居然要求公主規格嘅招呼，亦只肯留一日淨係出席台北嘅宣傳，其他地方就好少理，即時被人話耍大牌。
據知情嘅幕後人話，Baby要求公主級數嘅款待包括要求有隨行工作人員，化妝同髮型都要搵番自己嘅香港團隊，就連住嘅飯店都要講明係一間五星級酒店，另外仲要有spa按摩服務。
擅自發放短片
另外，Baby嘅粉絲早前喺微博狂貼《痞子英雄》嘅劇照，而Baby又將自己喺片中除剩內衣嘅短片發放出嚟，仲快過班宣傳人員做嘢，搞到佢哋頭都大埋。
而Baby目前就喺內地廈門同另一位台灣男星趙又廷合作，拍攝電影《第一次》，Baby今次仲玩素顏，又睇吓越來越大牌嘅佢今次玩乜嘞。