楊秀惠失落台慶最佳女配角，但她未有因此事灰心，因為背後有個靠得住的男人可以倚靠。秀惠笑言，拍拖以來多得男友阿Ray處處忍讓，她形容男友是最佳避風塘，可讓她做回普通女仔。
楊秀惠自從與孫耀威分手後，便戀上金融才俊阿Ray，拍拖以來人前人後都表現恩愛。秀惠覺得兩個人相處最緊要溝通，每次心煩時，男友都會在身邊鼓勵她。秀惠說：「我成日都煩佢（Ray），有時俾人話我太瘦，佢都會好有耐性咁解釋，着衫靚係重要，但演技更重要。」
家人冇催婚
很多藝人都不希望公開戀情，但秀惠就很大方，她表示：「好多人話拍拖會影響工作，但有佢喺身邊反而令我情緒更穩定，令我可以專心工作。加上佢啲親戚、朋友會當我係普通人，唔會同我傾娛樂圈啲嘢，搞到平時出街都以為其他人唔識我，反而令我更自在，佢真係我最佳嘅避風塘。」雖然與男友感情好，但秀惠依然唔恨嫁，她說：「家姐結咗婚，細妹同哥哥又就快結，屋企人都冇催我。」
早前秀惠在台慶輸掉最佳女配角，秀惠亦替得獎的陳敏之開心，她說：「今年對手咁勁，預咗自己唔會贏，敏之同定欣都係我好朋友，有時會互相鼓勵大家，討論吓點演好自己嘅角色。敏之攞獎，我都好戥佢開心。」
願效忠無綫
對於無綫高層陳志雲離職，明年又有幾間免費電視台加入，問秀惠有沒有人向她招手？她說：「全公司好多人都俾人挖角，但我份人比較念舊，唔想轉來轉去，對公司亦有感情，同好多監製都熟識，知道乜嘢劇啱我拍，我都想有好歸宿。」
撰文：林妃 攝影：葉君海
服裝及場地：ANAISS