華華噚日同中環人傾開偈，佢哋爆料畀華華知，話新地（016）同恒地（012）齊齊縮沙，唔贊助大除夕喺中環國際金融中心（ifc）放煙花與民同樂嘅盛事，原來係因為郭老太鄺肖卿同四叔李兆基發覺，自從放完煙花後，兩家人都唔多老利，到底點唔老利法？唔使多講，郭老太唔開心嘅事係三個寶貝仔鬧不和，搞到全城哄動兼無面子。
四叔方面，據聞有三單嘢唔多老利，首先有亞洲股神之稱嘅四叔畀股市貼士唔多準，搞到全城股民唔happy；佢大仔又捲入3個男B代母案爭論同官非，搞到佢頭都痕；仲有，恒地旗下西半山樓盤天匯跳層賣樓兼搞出世紀價成交惹起爭論，咁多事，四叔自然唔多爽。