劇集《天與地》收視創新低，情節不為追劇師奶欣賞，嫌劇情悶透；反觀年輕人對人食人橋段頗感興趣，對箇中分叉支線及複雜劇情抱好奇心態。本報記者日前在將軍澳區訪問近50人，大部份師奶年齡層均表示沒有追看劇集。
馬小姐：唔好睇，雖然大卡士，感覺麻麻同悶，幾個男主角完全唔似打band玩音樂，完全冇說服力，吸引唔到人，加上劇情一忽忽，所以睇咗開頭就冇再追，反而之前《萬凰之王》好睇啲。
石小姐：幾好睇，有追開，第一、二集都接唔到，再睇先明，鍾意劇中佘詩曼好有型，但老一輩會睇唔明講乜，因為中間穿梭以前同現代，但就係咁先想追，睇開都想知發生乜嘢事，會好奇，好過淨係睇啲爭家產、女人戲。
吳小姐：唔係每集追，但都幾好睇，見到佘詩曼俾幾個好朋友呃住，食咗佢男朋友都唔知，好慘。拍攝手法唔算太年輕，自己都接受個情節。
黃小姐：間中睇，開頭講乜嘢真係唔知，後來只知係有食人，年輕人比較少追劇，有時屋企師奶始終多時間啲，我覺得冇話乜嘢年齡層適合睇，我個人只係時間問題選擇性睇。
馮先生：冇睇，只係睇咗第一集唔知講乜，劇情飛前又飛後，難明白，雖然講到佢哋好有夢想玩音樂，但吸引唔到我。
徐先生：冇睇過，啲人唔係特別吸引我，加上冇時間去追，當年好hit嘅《金枝慾孽》都係重播時段凌晨睇。
