這些年的音樂頒獎禮，係會令真正聽歌的樂迷發火；五音不全、死唔斷氣、咬字不清，統統都有獎，頒獎禮淪為政治角力騷，收視不佳是有原因的。頒獎禮越爛，越令人懷念80年代的香港樂壇，旋律優美、歌詞動人、編曲細膩多變化，金曲多不勝數。上星期見市面有幾款寶麗金年代的LPCD45II推出，想不到已被翻過無數遍的80年代錄音，仍可以帶來一點點驚喜。例如譚詠麟這張母帶經LPCDM2處理的精選CD，經典金曲多達18首，頭1,000張不但封面有獨立編號，就連CD碟面都有，相當落本。當我聽了頭10秒，已決定推介給大家，你無可能未聽過《霧之戀》，但音色靚到極的《霧之戀》你就未必嘗過。聽聽開首的鋼琴引子，清純、鏗鏘、通透、無雜質，譚校長的演繹情感真摯，從來無一首《霧之戀》扣人心弦的程度是如此淋漓盡致，你話錄音靚有多重要呢！
文：李廸偉
（http://blog.yahoo.com/audioblog）