國泰航空香港國際大賽於十二月十一日舉行，是日天朗氣清，陽光普照，雖然氣溫大降，馬迷站在陽光底下睇馬，唔覺得點樣凍，呢日有近六萬二千人入場，企滿馬場，情況認真熱鬧，鄧小平講過，香港回歸後要「舞照跳，馬照跑」，以示特區之特，係極有前瞻性之講法。不過香港往往有啲小人物，小議員，只見樹木，不見森林，幾個月前捉住一啲私家私人會所嘅批地條款大做文章，話啲會所所在地係政府批地，租約期滿之時，政府應該強制性加入一啲條款，例如鄉村俱樂部要開放俾公眾入去作「康樂活動」（recreationalactivitives），延續私人租約（PrivateRentalLease）之前，仲要搞吓公眾諮詢會。香港有七十個以上嘅會所今明兩年到期，民政事務局即刻做到頭昏眼花。新界好多地契回歸前計到一九九七年六月三十日到期，一九九七年七月一日起再延長十五年，即係明年六月三十日滿約，相信沙田馬場就係此類。
民政事務局若然唔批馬場PRL延期，怎麼辦，此乃不可想像之事，試想像賽馬為香港帶來幾多直接就業，幾多稅收（每年百幾億），以及帶旺幾多行業（報紙、報販、食肆、交通、旅遊等等），香港特區政府點可以停止沙田馬場跑馬，諗吓都覺得啲政客係儍嘅，曾德成局長唔會跟佢地儍呀嗎？如果要諮詢嘅，問吓十二月十一日入沙田馬場嘅六萬二千人先啦，計埋跑馬地馬場嘅馬迷，一共六萬七千人參與國際賽，比投票選選委嘅六萬五千五百人還要多，曾特首人在馬場頒獎，唔通佢唔知道全港最大嘅民意就係支持香港永遠馬照跑咩？明年七月一日做特首嘅，一係姓唐、一係姓梁，唐生做過馬會董事，做過馬主，係馬照跑，沙田馬場PRL延期幾十年之事，相信立場鮮明，梁生平時好少去馬場，但以佢咁醒目，正在努力爭取民意，唔會與全港馬迷為敵，與鄧小平對着幹呀嗎？梁生夠膽唔批馬場PRL續期，吾不信也。曾德成局長除非俾道德塔利班威脅，唔應該等到明年到期前先至將沙田馬場PRL延期嘅。