現年32歲的鄭文告別了在有線CEN的8年主播生涯，她沒有續約，反而加盟now擔任綜藝節目主持。離開CEN當然不捨，鄭文所以下這決定，全因去年誕下囡囡，她希望工作之餘，有更多時間照顧家庭。
鄭文算是有線CEN成立的第一批主播，在CEN的八年生涯中，她有得有失，除學會了訪問藝人的技巧，並到世界各地採訪，豐富了人生閱歷，不過在有線的工作時間始終較長，加上她去年誕下女兒，鄭文於是為自己的去向打算，選擇了工作時間較彈性的now。
難忘被秋生窒
鄭文表示沒跟有線續約，其實與他們改革也有點關係，她說：「咁啱呢個時候cable想改革，想講多啲時事新聞，因為我唔係好熟，而咁啱now呢邊嘅工作方式好啱我，所以就冇同cable續約。」
回想起剛入行，鄭文有很深感受，她說：「嗰時出嚟，乜都唔識，儍吓儍吓，同秋生做訪問俾佢窒一窒，即刻失晒魂，我好記得嗰時有線開台，我哋俾人封殺，個個同TVB簽咗約嘅藝人見到cable嘅人都即刻掉頭走，仲要俾記者影我哋被藝人拒絕，嗰刻都好難受。」
鄭文去年誕下女兒，湊女生活也不算太艱難，她說：「辛苦就一半半啦，佢可愛時就好cute，惡起上嚟就好難搞，好彩老公都有分擔吓湊女。」
敍舊傾湊仔經
鄭文坦言不會做全職媽媽，因為知道自己性格緊張，會過份關注女兒的成長。問她會否再多追一個小孩？她表示會，但要待女兒長大一點。同是有線出身的余思敏、區永權都已為人父母，鄭文表示閒時大家會相約傾湊B經，真的感到時光飛逝，轉眼間大家都已成長了。
採訪：溫敏芝 攝影：葉君海
場地提供：海港城
