全球首對智能球靴　住你偷懶

全球首對智能球靴　住你偷懶

上星期巴塞作客反勝皇馬一役，皇馬班球星唔上力夾無表現，令球迷勁失望，睇嚟摩帥好應該考慮吓adidas全球首對智能球靴喇。呢款號稱全球最快嘅adizerof50球靴，配合速度感應器，可以喺iPhone上睇番球員表現數據，眼見C朗呢啲大牌球星無表現，絕對有晒理據換佢出場！

記者：許福合
攝影：伍慶泉
Model：Boo@PureModels
查詢：Adidas旗艦店（27300157）

步速、衝刺乜都知

去到綠茵球場上，當然要着番對球靴表演吓球技，揀球靴時除了選擇款式之外，仲要追上潮流講高科技。adidas最新推出的adizerof50球靴，除可令球員發揮更高速度外，仲可以成為智能化訓練工具！秘密在於鞋墊特別設有凹槽，可以放置miCoachSPEED_CELL速度感應器，捕捉球員全方位動作，更能儲存達7小時運動數據，並以無線方式傳送到iPhone、iPodTouch、PC或Mac上。數據收集項目廣泛，例如各種速度數值、衝刺次數、總移動距離等，甚至連步幅同步頻都可以睇到，除可重點針對自己做得較差嘅弱項外，連邊個偷懶唔願郁都一目了然。

■球員的運動數據，最多可儲存7個小時。

■數據接收器miCoachSPEED_CELL（$799）

■adidas智能球靴adizerof50（$1,499）

波Game表現　靠真人訓練

整套miCoachSPEED_CELL會跟一個iPhone接收器，到AppStore免費下載《miCoachFootball》App，安裝好就可無線接收數據。最過癮係App內包含足球Game，利用虛擬控制器操作傳球、射波、加速等動作，操控不俗，不過，此遊戲精采之處在於可配合由miCoachSPEED_CELL收集而來的數據，真實的訓練及參與次數越多，遊戲內球員表現便越好，而且隨住App更新，會陸續加入更多花臣，作為球迷兼機迷，真係好期待！
做出好數據，當然要喺班朋友面前威吓，訓練數據仲可經電腦、fb及twitter分享。另外亦可上傳到adidas互動網上訓練系統miCoach.com，同國際頂級球星如美斯所做出嘅成績，互相切磋一下㖭。

■完成訓練之後，就可以立即睇番成績。

■遊戲以虛擬控制器操作，跟大路足球Game相似。

■將數據上傳，便可跟全球用家成績作出比較。

■隨住真人努力訓練，足球遊戲內球員亦會升呢。

■亦可以分享到fb，公佈自己苦練好成績。

■遊戲開始前，可設定球場、難度及時間。

實戰示範

■先將SPEED_CELL放入f50的凹槽內。

■穿上f50後，不覺得鞋底多了個感應器，完全無影響訓練。

■訓練完，將另一接收器插入iPhone，便開始接收數據。

■有齊圖文顯示數據，狀態起伏一清二楚。