洋人重視聖誕節嘅程度拍得住中國人重視農曆新年，所以，歐洲各大球會呢輪都不斷有開聖誕派對嘅報道；不過，我求大俠感受最深嘅，就係意甲AC米蘭喺周三舉行嘅聖誕派對喇！因為見到早輪疑似中風嘅卡斯辛奴，可以開開心心咁同埋妻兒出席派對，我求大俠都戥佢好開心；但另一方面，又見到曾經叱吒歐洲球壇嘅靚仔前鋒恩沙基斯人獨憔悴，就令我好心噏。
卡斯辛奴中風後無恙
喺星期三，AC米蘭由會長兼前意大利總理貝盧斯科尼吹雞，喺米蘭舉行AC聖誕派對。既然老細吹雞，全隊上下個個都着到靚靚咁撐場，其中伊巴謙莫域同柏圖等AC當紅炸子雞一到場，閃光燈即刻閃唔停；而前鋒卡斯辛奴帶埋太太同佢哋嘅愛情結晶品到場，亦令全場起哄。當然啦！卡斯辛奴喺10月底嗰陣疑似中風後，大家都好擔心佢嘅康復情況，但係喺周三見到佢行得走得，表現風騷，似乎乜事都冇，唔怪得AC斟曼城前鋒泰維斯加盟單嘢，傾傾吓都轉軚叫停啦！
喺呢個衣香鬢影、人人都四萬咁嘅口面嘅場合，有一位仁兄就斯人獨憔悴，佢就係前鋒恩沙基嘞。鬼咩！38歲嘅恩沙基雖然曾經為AC立下唔少汗馬功勞，但今季完全唔受重用，喺歐聯又冇同佢註冊，仲盛傳佢喺1月會走人。出席球會呢啲咁嘅場合，又難怪佢黑面同唔想人影相嘅。
居倫着透視裝騷身材
喺英超，繼曼市雙雄之後，阿仙奴亦開咗聖誕P；不過，球員多數都係便裝一度到場，雖然唔似曼聯咁唔畀WAGs出席，但兵工廠嘅聖誕P亦係唔多見到球員攜眷出席。至於利物浦雖然仍未舉行球員派對，但隊長謝拉特嘅太太居倫就已經率先出動，參加佢嘅至愛時裝店搞嘅聖誕P。雖然居倫生咗第3個女唔夠兩個月，但佢已對自己身材好有自信，着黑色喱士透視裝出席。另外，佢早前仲同3個女同丈夫謝拉特一齊接受英國某雜誌訪問，又大show佢哋嘅豪宅，都幾晒命。