重量級新股周大福（1929）今日掛牌，噚日率先公佈招股結果，周大福係彤叔嘅「心肝寶貝」，自然有唔少員工信晒佢，諗住買多少少當係年尾花紅。
不過噚晚暗盤價跌到一仆一碌，華華唔想潑冷水，不過着實為周大福嘅員工擔心。
招股書話約有2400位員工合資格預留股份，最後有差唔多65%，約1550員工用粉紅表優先入飛撐彤叔，都算係幾齊心。喺千多份粉紅表中，最多人認購10手，共收到400多份申請，中籤率95%。另外有36位員工重槌買3萬股，最後中咗1.2萬股。
不過，近日新股市場狂吹冷風，前日搶閘嘅大熱保健股率先跪低，相信千五位周大福員工正祈禱不要發生呢種慘劇喇!