國際大賽當日，左丁山手癢癢，寫咗四場大賽嘅「貼士」，入到馬場，見到好少好少入場嘅編輯P，人稱P少，P少話：「我分不出東南西北中，總之今日四場都跟你嘅專欄貼士買！」哎吔，唔好呀，輸咗鬧我，咪好唔得閒？點知跑第四場香港瓶，左丁山寫三隻馬，5號多利得，9號自由好，10號紅色禮物，另加1號始創先鋒，5、9、10三隻夠運中咗三重彩，派彩二千七百七十，當場有人拍左丁山膊頭讚好，到咗第五場跑千二米短途，左丁山先睇好1、2、4、6、14，臨場睇到隻老馬13號「時尚風采」有冷門味道，改買，1、2、4、6、13五穿十連贏及位置Q，分析名師青姐又係馬場稀客，呢日應邀入場，猛咁問：「我要買冷馬，回報率有兩倍就好過買股票好多啦！」買滙豐賺兩倍就話發啫，買馬贏兩倍就係熱到燙手嘞，邊度係冷馬呀，可見青姐平時只買股票，不識買馬。於是膽粗粗叫佢買13號位置，唉吔，果然爆出，青姐落咗二十大元，收番二百三十六元，即呼：「好過買基金多多聲！」佢又真係醒，即刻止賺，唔再落注咯。P少呢？人又係醒目嘅，初哥到馬場，見隻4號天久最後賠率急降，於是只買獨贏及位置，真係收錢笑呵呵！
左丁山就笨蛋咯，中咗條天久/時尚風采連贏及位置Q，信心爆棚，第七場照住自己貼士買，估唔到老馬（九歲）步步穩配上一個五十歲老騎師勞愛德竟然爆大冷（六十六倍），為年逾八十歲嘅馬主李福鋆帶來大賽冠軍，果真老而彌堅，但左丁山輸咗一半注碼！第八場仍然信心爆棚，臨場睇馬認為「雄心威龍」弗到震，贏硬，搵2號雄心威龍做膽，拖1、3、5、6，唉吔吔，韋達真的不是大賽騎師，竟然跑個第四。左丁山乜都輸清，全日得個吉，冇錢贏！
次日立即收到讀者電郵，鬧左丁山亂咁俾貼士，佢照跟，輸死咗㖭，佢又叫左丁山以後俾貼士要俾啲有用嘅，否則唔好俾！鬼唔知咩，臨場睇馬有好多變數嘅啫，事前點會估到「時尚風采」與「步步穩」兩隻老馬會跑得咁好呀！既然讀者如此要求，左丁山以後唔再寫業餘貼士咯，請大家睇方駿暉、王登平、吳志林呢啲大行家。