豬狼之戰已經成為每日城中熱話，金融服務界18位選委亦塵埃落定，自然日日俾人問會揀邊個，當中只有三幾位有明確立場，其餘未肯公開表態。
一早表態支持唐英年嘅金融界立法會議員詹培忠（圖）好鬼識做，18位選委當選無耐，佢即刻邀請佢哋下星期一喺灣仔食飯。金勞詹同華華講，呢餐飯純粹為咗恭喜18位選委當選，唔係為唐唐拉票。
呢18位選委被選得出嚟，自然好有代表性，多啲聚頭，團結起嚟，議價能力咪強啲囉。唔好話出年選特首，以後政府、證監會同港交所（388）有咩新嘢要推，都可能要問過佢哋先。
值得留意嘅係，18位選委各自屬於至少4個證券業組織，最多代表應該係證券業協會，共有6位，華華聽講，部份選委希望先喺自己個會度攞到內部共識，先決定選邊個做特首，睇嚟詹培忠想拉票都唔係咁易。