28年前參加近藤真彥模仿大賽的蔡一傑，當年梳着「孖池cut」髮型，模仿着偶像孖池，唱他的大熱歌《HIGHTEEN．BOOGIE》加招牌踢腳動作，贏得冠軍。後來做了梅艷芳的徒弟，更有機會與偶像見面。日前孖池來港開演唱會，傑仔回復粉絲身份，到後台與偶像合照，兼送上禮物，更親自寫了信，找人繙譯成日文送給孖池。
蔡一傑最近找回25年前與孖池的合照，他開心謂：「80年代我歐美、日本、香港流行曲都聽，麥當娜、近藤真彥、田原俊彥、陳百強等等嘅歌都好鍾意，朋友慫恿幫我報名參加比賽，點知贏咗。」
六本木尋開心
傑仔繼續興奮地憶述說：「之後有一次，佢喺家嘅洲際酒店搞歌迷聚會，佢哋叫我上台再扮多次，唱到興起，佢身邊嘅少年隊仲上台同我伴舞。睇番合照，我同佢都冇乜點變，佢一見到我就好興奮大叫。」他還表示草蜢的雛形，便是他想參加新秀，拉攏蔡一智與蘇志威組成兄弟班參賽。
其實傑仔隨梅姐到處登台，已經在早年認識孖池，他回憶與偶像一起到處蒲的日子，他說：「我哋仲同過孖池，去六本木嘅酒吧玩，一齊唱K。諗起細個時候視為偶像嘅，以為只可以喺電視見到，點知可以咁近，人生真係好奇妙。」他還受孖池影響，在舞台表演上獲益不少。
日文信獻偶像
所以傑仔在日前到九展欣賞孖池個唱，便準備了禮物和信，有如fans的他說：「做咗咁多年人哋嘅偶像，今次我就變番人哋fans，我買晒禮物，而且仲寫咗封信，搵人繙譯成日文，佢一拆禮物好開心大叫sugoi（好得很）！」
採訪：王連連