中電（002）主席米高嘉道理母親、嘉道理老夫人Muriel本月5日辭世，佢一班後人噚日中午喺淺水灣影灣園為老夫人舉行生命禮，邀請好友出席送老夫人最後一程。
嘉道理家族係香港嘅名門望族，又係各大富豪榜嘅常客，除經營為人熟悉嘅能源業務之外，仲有經營地產、工程、建築、酒店等業務，而且熱心公益，於城中結交到不少知心好友。華華所見，除咗特首曾蔭權同前政務司司長陳方安生到場外，出席嘅仲有長實（001）主席李嘉誠同佢大仔李澤鉅、東亞（023）主席李國寶夫婦同二公子李民斌等商界名人。
米高嘉道理接待好友
據嘉道理家族之前喺報章刊登嘅訃聞介紹，老夫人享年96歲，除咗仔女孫兒，仲有三名曾孫，可謂四代同堂，福壽雙全，所以算得上係笑喪。
現場所見，生命禮氣氛亦相當祥和，米高嘉道理滿場接待出席嘅好友，不時同好友有講有笑，未見有太傷感場面。華華在此亦希望老夫人一路好走！
李華華
mailto:[email protected]
