香港好多家長都望子成龍,仔女細細個就幫佢哋報讀一大堆興趣班,一嚟唔想啲心肝寶貝輸在起跑線上,二嚟又可以增加入名校嘅機會。喺美國踢洛杉磯銀河搵真銀嘅碧咸亦唔例外,幫6歲大嘅三仔告魯斯(左)報讀跆拳道班,告魯斯人仔細細,但打起上嚟非常投入認真,絕對有姿勢、有實際,最近仲通過考核,由最初級嘅白帶,升上高一級別嘅黃帶;雖然技術距離最高級嘅黑帶,仲有一大段距離,但英國傳媒見到告魯斯嘅英姿後,鬼咁興奮,話唔定長大後可以代表英國出戰奧運。