家族資產超過百億的利孝和女兒利蘊珍，9月踩越野單車跨越絲路，為助港童成為運動員籌款，昨晚利氏成員到場支持她成立基金。利蘊珍昨晚在活動上自爆在新疆踩單車踩到撻地受傷，包住傷口憑意志完成，稍後會帶領30個小朋友跑馬拉松。
利希慎孫女、利孝和女兒利蘊珍昨晚在灣仔宣佈旗下的運動助學基金「運動燃希望基金」成立，媽咪利孝和夫人、利氏家族成員利承武、FranckMuller代理周譚惠菁等都出席支持。
仔女備受影響
利蘊珍為成立基金籌款上陣，9月中和香港三項鐵人代表李致和等一齊踩越野單車，三日內頂住40多度高溫，由伊朗穿越絲綢之路，到達新疆喀什。她昨晚一身黝黑膚色，她說：「今日請咗百幾位朋友嚟，佢哋全部都幫過基金，家籌到7位數字，目標係幫助香港小朋友運動，香港人應該幫番香港人。」
問到絲路之旅最艱辛一役，利蘊珍說：「最尾去到喀什市，試過撻親，架車仲撞到導遊，一齊跌親，因為去到尾段個人好攰、好緊張，入到城又好多車，不過最終包住傷繼續，都完成咗。當時屋企人都好擔心，但我唔會放棄。」她指今次挑戰絲路成功，下一步會帶領30個小朋友一齊跑渣打馬拉松。利蘊珍的女兒Alexandra昨晚都有出席撐媽咪場，問到仔女有否參加體育運動，利蘊珍說：「佢哋喺外國讀書，都受我影響。」
母親不談TVB
此外，六叔邵逸夫辭任無綫主席，陳志雲又離職，問到利孝和夫人利陸雁群可擔心無綫前景，她即詐聽不到說：「今日係我個女嘅活動，係一件好事，鼓勵年輕人做運動，其他嘢就唔講喇。」同場的利承武就自爆運動是個人弱項：「我踩半個鐘單車都喘氣。」
採訪、攝影：盧妹
