我求大俠其實幾欣賞曼聯中場費查，由初出道「瘦猛猛」俾人笑佢「廢柴」，到表現得到認同，背後肯定付出好多血同汗；天意弄人，曼聯喺禮拜二向外證實，費查因潰瘍性結腸炎（UlcerativeColitis），將無限期休息。紅魔冇埋呢位費格遜愛徒，中場就更缺人腳，認真頭痕。
處理不當隨時變癌
屋漏兼逢連夜雨，曼聯喺歐聯出局，先有隊長兼後防重心尼曼查維迪確定因傷提早收「咧」，冇耐就再收到呢個壞消息；紅魔喺禮拜二發聲明話，費查因為健康問題會暫時休息，未有確實復出時間。費查上季都因病缺席咗唔少比賽，當時球會話佢係受病毒感染，但見佢瘦咗成個碼都知唔多對路；曼聯證實費查當時患嘅病係潰瘍性結腸炎，以為好番點知最近情況又嚴重咗，如果唔好好處理，有機會病變為癌症，所以逼住接受專家建議，靜心休養。
現年不過27歲嘅費查係曼聯青訓產品，初期出道踢右中場，外界普遍認為佢唔夠班踢紅魔，加埋睇嚟相當柔弱嘅身軀，「廢柴」之名不脛而走。03年碧咸離隊原本係費查上位嘅機會，據講初頭原本係由佢繼承萬人迷件7號波衫，點知球會臨開季簽咗C朗而冇成事。
雖然冇星味，但費查勝在夠勤力、夠爛打，踢吓踢吓終於搵到自己最佳位置防守中場；過去10年曼聯球員不斷進進出出，深得老費歡心嘅費查就一直屹立不倒。雖然唔係必然正選、上陣時間冇保證，但一直冇聽過費查有怨言，一有機會落場搏盡，呢啲絕對係職業球員應有態度。
鬧中場荒或借祖記卡錫
曼聯冇埋費查，家中場就更加唔夠人用。湯卡華利同路爾斯安達臣仲唞緊、傑斯冇力場場踢，情況唔多樂觀，睇嚟費Sir都要趁1月轉會市場重開增兵喇。
據講曼聯打算借用意甲祖雲達斯嘅卡錫，呢位塞爾維亞翼鋒完全唔受祖記教練干地重用，今季長坐冷板，可以去曼聯博吓重生都啱數。
話你知：「年輕病」難斷尾
香港體院運動醫學部黃平山醫生表示，潰瘍性結腸炎又名免疫系統失調病，可以是先天遺傳或後天細菌感染，是一個「年輕病」；70年代的香港很少見此病，但近十多二十年，隨着社會西化，多了人患此病，但不算普遍。潰瘍性結腸炎難斷尾，像費查此案例，可能屬嚴重個案，會不停復發。在英超如此高水平作賽，費查要承受兩種危機，一是在比賽時被撞到腹部，有可能引致大腸破裂；二是因壓力再遇上免疫系統失調。根治方法是將大部份大腸切除，一世孭住排泄袋做人。