金管局前總裁任志剛公開挺唐英年參選下屆特首，即時激活唐唐選情。任志剛昨日接受訪問時透露，唐英年對本港金融政策制訂有實質而重要貢獻，05年金管局推出雙向兌換保證，時任財爺的唐英年頂住反對聲音，全力支持聯繫滙率優化改革，「冇佢拍板做唔成」，「能居安思危，寶貴過危機出現後再處理」。記者：劉美儀
未來幾年，國際形勢風雨飄搖，任志剛同意，香港將面對「前所未有」的挑戰，港府「首要」具備一位有經驗、凝聚共識及駕馭複雜形勢的「舵手」如唐英年，「而非一意孤行的人」。作為唐營顧問，任氏對出謀獻策內容滴水不漏，強調自己僅屬顧問團隊中一員，一切留待唐唐展述其政綱及施政理念，又笑說「顧問意見係唔應該公開嘅」。
撐唐「唔存在施恩」
外界分析任撐唐，是「報恩」之舉，任志剛說，「唐先生對包括我在內知人善任嘅賞識」，「唔存在施恩」或「給予任何恩惠」，唐亦非「望報」之人。對於其他候選人如梁振英等，是否不具備他口中「凝聚共識」及「高瞻遠矚」的領導才能，他拒絕評論其他人選，只重申本港需要富經驗具眼光、臨危不亂的領袖，未來問題日趨多元化，社會「真係需要同心協力」，「唔係為做嘢而做嘢，行出來以表示自己有能力做到嘅人」。
任志剛回顧往事，說外界容易低估唐英年的能力，而且對方貢獻良多，他自己因擔任金管局總裁多年，市場常以為所有政策均由他一人主導，但總裁若缺少財政司司長配合，很多政策「做唔成」。
05年5月金管局推出3招優化聯滙措施為例，其中提出雙向兌換保證，令港元穩度隨後而至的人民幣滙改下，大量熱錢湧入炒港元「升甩鈎」的危機。任志剛透露，當年確有不少包括外滙基金諮詢委員會委員及市場的反對聲音，但時任委員會主席的唐英年最終「大力拍板」支持；而新機制成立後，港滙獲進一步穩定所產生的正面意義，是「有目共睹」。
近期電視劇《天與地》台詞「thiscityisdying」熱爆，任志剛笑說，港人感覺有時「係較波動性同埋強烈咗啲」，特別面對眼前不順景，不滿聲音或會略微放大，但從客觀看，本港相對外圍經濟表現不算太差，加上背靠內地經濟高速增長，受惠不菲，不過他同意歐債危機令人憂慮，前路確實崎嶇。
任志剛專訪答問：
問：你話過退休後唔會再做全職工作，財爺無part-time㗎嘛，咁你係咪全方位杜絕出任下屆財爺嘅可能？
答：我好尊敬朱總兩句話，「鞠躬盡粹，死而後已」，我可以做到鞠躬盡粹，但我怕死呀，死而後已就做唔到…喺現時政治環境下，我未必生存到…會死㗎…我六十幾歲啦，體力隨年紀衰退…人生有幾個十年？
問：你話唐英年對金融好有經驗，有無實例？譬如喺聯滙政策上有乜貢獻過？
答：05年5月，係佢大力支持雙邊兌換保證，之後7月人民幣就滙改啦……當時反對唔少，無佢拍板（雙邊保證）做唔成。
問：你贊許唐英年凝聚共識知人善任，是否梁振英無呢份才能？
答：我唔評論其他候選人，不過未來幾年，香港極需要有經驗、隻手好定嘅舵手，唔係為做嘢而做嘢，出嚟話有能力做到嘢嘅人。
問：邊個係thenextsecondbestFS？（誰是下屆第二理想財爺人選？）
答：應該講「whoisthebest？」（誰是最佳人選），香港人才好多，好多人會好過我……金融界有，政府入面亦有。