股市唔掂，連交易廣場對開廣場對水牛都要被迫遷！
乜咁慘情？因為交易廣場發展商置地公司計劃重建富臨閣（TheForum），所以嗰對香港金融中心嘅象徵之一──銅牛雕塑，同埋台灣藝術家朱銘嘅太極系列等著名藝術品，會暫時喺大家眼前消失，等重建完先搬返入去。
置地執董周明祖同華華講，重建工程今個月展開，富臨閣將會拆卸，重建成一幢5層高寫字樓，總樓面超過4.8萬平方呎，比家多出15%，重建涉資5.6億銀。
富臨閣重建 渣打想租晒
對水牛同埋其他雕塑會暫時拆走，重建完成之後會擺返喺廣場，但就唔會喺家陣個位！整個計劃2014年頭完成，富臨閣到時會變成一幢水晶狀透明建築物，廣場周圍會設置空中花園同噴泉。
周明祖話，富臨閣同交易廣場3座寫字樓都係1988年落成。當時周圍唔多商場，富臨閣嘅角色主要係租畀餐廳、超市，用嚟支援寫字樓租客。不過，家周邊發展好成熟，富臨閣亦都完成歷史任務。市場對中環寫字樓求過於供，所以就善用資源。雖然重建仲未落成，但已經有間公司傾緊租晒全幢。據聞呢個大租客就係渣打（2888）。
英國水牛守護港交所
WaterBuffaloIandII，英國雕塑家伊莉沙伯．弗林克（ElisabethFrink）1985年作品。
兩隻水牛喺香港交易所門外，各據一潭淺水。牛喺股市代表升，水為財，當然有吉祥寓意。
弗林克雕塑設計特色在於先鑄成石膏，然係喺石膏上面加以雕琢，所以作品表面比較粗獷。佢嘅動物雕塑另一特色係造型簡樸，表現得有啲茫然，又幾似一眾股民散戶嘅心態喎。
