MR-S變臉吸睛

雖然玩車多多少少都係用錢堆砌嘅玩意，不過花臣眾多，有人專揀最新最快最獨特車款，有人喜歡老爺車，亦有人願意買部錢七回來，左改右改，最終改裝費可能遠遠高於車價，不過無論如何，目的都係令自己開心，揸住出街，一樣惹火吸睛，呢兩部豐田MR-S做得到之餘，亦演繹出不同風格。

記者：趙慧敏
攝影：楊錦文
Model：AnnieG.@GME

火紅身：惡相似拉利

呢部鮮紅色車身，Size明顯較原裝版本大足兩個碼，全靠車主為全車重新打造車身輪廓。咁浮誇，同車主都係車壇中人似乎幾有關係，事關車主就係錢家班嘅飛車特技人海堂。玩車無數，搵部2000年嘅MR-S大改特改，當然有佢理由。「呢架車買番嚟都係幾萬蚊，性能相當唔錯，改吓個外殼，已經好夠。」不過所謂改吓，絕對唔係小改咁簡單，加碼嘅外殼係度身設計重新打造，車身兩側由原來較為柔和線條改為更硬朗嘅骨線，而且由車頭直伸至車尾位置，沙板亦大幅改大，增大後輪沙板入風口，配上巨型定風翼、導流板及大口徑排氣喉，惡相之餘，驟眼看來，竟與法拉利有幾分相似。至於內櫳亦花咗唔少心思，鮮紅色格仔紋真皮座椅，連門板亦襯到絕，最終計埋18吋合金輪圈等等濕碎數，幾萬元車價加埋超過十萬元改裝費，與當年新車價不遑多讓。

■海堂認為MR-S充滿玩味。

■鮮紅色皮椅，令全車YoungLook之外，亦貴氣咗唔少。

■車身換為剛直條線，令Size加大兩個碼。

■車尾配上導流板及大口徑排氣喉，頗似拉利。

■車尾定風翼屬TopMix威哥自家設計之作。

■車頭擾流經過重新設計，令車身更低更貼地。

黑白配：換碳纖更輕身

明明MR-S只推出軟篷版，點解有款係硬頂，一字咁淺，就係靠改，車主Alan絕對係碳纖迷，同樣2000年出廠嘅MR-S，當年應該未流行到用日版碳纖車頂咁巴閉。其實除咗車頂，前後冚、側鏡都換晒碳纖，與原來白色車身營造黑白配，視覺效果一流。Alan話改碳纖唔係貪靚咁簡單，另一個原因係偷輕咗唔少車身，令原來只有975kg車身再減磅。二手車價只係八萬蚊，改裝亦改足八萬，不過Alan亦覺得物有所值。「換咗碳纖之後架車輕咗，操控性更強，可能個樣夠騎呢，出到街真係好多人望過嚟。」相信呢種虛榮，唔係揸Supercar獨有嘅！

■車主覺得花八萬改車物有所值。

■沙板入風口為車身焦點。

■由原來軟篷換成碳纖車頂，屬獨家設計之作。

■頭冚及尾冚都用上碳纖，所有入風口都經人手打造，很考功夫。

■側鏡都貫徹碳纖化。

八十年代可以話係東瀛飛仔車最光輝嘅年代，當年MR2面世，成為多少年輕人嘅DreamCar，直至九十年代尾，MR2以MR-S姿態再出現，一樣惹起哄動，不過大大話話到家都十幾年，市面上嘅MR-S已經買少見少，難得搵到兩架靚到震嘅改裝版MR-S，點會唔令人興奮。

■與改裝版比較，原裝MR-S反而顯得斯文。

2000年版豐田MR-S規格表

引擎：1,794cc直4VVT-i引擎
馬力：140ps/6,400rpm
扭力：17.3kgm/4,400rpm
傳動：5速手波後驅
車輛提供：TopMix（26927768）