舊年嘅港姐冠軍陳庭欣一向好孝順，前晚佢喺黃竹坑南朗山道熟食巿場幫做警察嘅爹哋提早賀壽，嗰度係平民化大牌檔，佢哋買咗海鮮交畀食肆煮。大馬拿督女莊思敏同莊思明姊妹花都唔介意踎大牌檔，大班人熱熱鬧鬧擦番餐。
呢餐平民宴絕對唔係酒微菜薄，佢哋豪擦大蝦同鮑魚，陳庭欣仲不時幫爹哋斟紅酒。陳庭欣為咗冧壽星爸，特別訂製約10吋高嘅獎盃送畀老竇，壽星爸high爆滿場飛敬酒，臉上略帶醉意。
陳庭欣呢次幫爹哋擺咗兩圍，但未見佢嘅緋聞男友黎諾懿同翟威廉撐場，反而莊思敏同思明兩姊妹就嚟咗，但未見有男伴。講到同壽星爸祝壽，陳庭欣噚日喺電話訪問話：「爸爸鍾意熱鬧嘛！」至於嗰個獨一無二嘅獎盃，佢話：「我搵人刻咗爸爸個名，仲寫住『香港最佳爸爸』，佢收到好開心。」