被車路士放棄嘅法國射手安歷卡，周一終於決定唔搵英鎊去搵人仔，同中超上海申花達成轉會協議，並簽下兩年嘅合約，申花老闆朱駿仲好開心將安歷卡嘅合照放上微博，車路士官方確定消息。據外電估計，安歷卡周薪最高達20萬鎊（約250萬港元），咁高人工搵你，梗係唔係單靠踢波搵食，仲要幫朱駿做埋網絡遊戲代言人。
隨時做埋遊戲人物
安歷卡一直未獲車路士新任領隊波亞斯重用，今季聯賽至今只3次正選6場後備，入得一球波，被車仔放棄都已經預咗。不過呢位32歲法國前鋒都好有計，成功轉會到上海申花，過吓中超癮之餘，人工一啲都唔差。安歷卡同申花都冇公佈佢嘅人工，不過各傳媒預計達17萬至20萬鎊周薪不等，ESPN就估計安歷卡收20萬鎊周薪人工，同曼城嘅阿古路睇齊。照計安歷卡作用同前景，點都及唔上23歲當打嘅阿古路，所以收得咁高人工，朱駿梗係要人盡其才啦。
安歷卡周一先正式加盟，上海申花已經出咗佢嘅合成圖，除咗身披印上網絡遊戲FireFall（火瀑）字樣嘅波衫，另一邊就有埋遊戲嘅機械人角色，安歷卡如無意外做埋FireFall代言人。其實朱駿做主席兼CEO嘅遊戲公司第9城市，肯定唔止FireFall一個game，遲啲大家可以睇到安歷卡打怪獸之餘，隨時扮鬼扮馬做埋其他遊戲人物。
打算簽埋杜奧巴、古迪
安歷卡加盟申花，立即成為中超最高人工球員，恒大上年簽入阿根廷中場達里奧干卡，都只係700萬美元年薪（約5,440萬港元），有中國傳媒預計，安歷卡一人一年人工，已經同恒大5名外援達里奧干卡、穆里奇、克萊奧、趙源熙同保隆睇齊。不過申花上季聯賽只排11位，要打低恒大王朝，一個安歷卡都未夠，又有傳申花想搵法國籍嘅泰簡拿做教練，有安歷卡同聲同氣，成事機會高咗。另一位車仔前鋒杜奧巴，同前皇馬中場古迪，朱駿都話想簽埋佢哋，睇吓又成唔成事？