率先試AGS勁Game　嘟女有獎攞

12月23日開鑼嘅AGS（亞洲遊戲展），絕對係一眾Game迷必Join盛事，大哥SCEH當然派出最強陣容應戰，事先張揚嘅PSVita自然係攻堅，再加埋PS3巨作《FFXIII-2》，同首創「賞嘟」送大禮，「三叉擊」攻勢，軟硬都咁有睇頭！

記者、攝影：韓繼聰

搓圓㩒扁《塊魂》　PSV攻勢

AGS未開鑼，SCEH已搞咗個發佈會先聲奪人。雖然PSV已多次曝光，但依舊係發佈會焦點所在，試玩人數眾多，不過奇怪嘅係女仔竟然多過男仔，靚女Models爭住輪玩PSV。細探究竟，原來今次試玩的是歷代都極受女性歡迎嘅《塊魂》，見靚女利用兩支Analog掣，不停喪吸周圍雜物，將個波波不停谷大，仲可以用埋機背嘅TouchPad，將波波搓圓㩒扁，又真係幾卡娃兒喎！加埋系列抵死「兄貴」角色，難怪班女仔玩到笑口噬噬。靚女Lulu一邊雞手鴨腳一邊話：「一向都鍾意玩呢隻Game，不過今次要掃埋機背嚟玩，真係要多啲時間熟習。」

■靚女Lulu玩《塊魂》玩到手忙腳亂，顧得上又顧唔到下。

■《塊魂》嚟到PSVita，加埋掃背機能，玩法更具變化。

■玩家陳生，大讚PSVita好抵玩，早已鎖定佢為AGS首買目標！

■用手指同MJ跳月球漫步，好過癮。

■頭30位PSV買家，可獲贈小遊戲《LittleDeviants》。

■一系列PSV護航勁Game，聖誕新年唔憂無機打。

必搶《FF》同梱機　PS3重頭

另一邊廂，一班熱血男孩就圍住《FFXIII-2》狂玩，畫面靚就梗㗎喇，戰鬥動作亦極為流暢，一貫FF系列嘅華麗帥氣。見主角聯同召喚獸及陸行鳥，大戰機械兵團，唔玩齋睇都夠興奮。再落手試玩，同巨型機械兵惡戰，更感受到場面嘅震撼！畫面、故事、戰鬥系統都可謂完美，難怪歷代《FF》都係Game迷必玩之作。AGS期間，推出50套行版《FFXIII-2》PS3主機套裝，每日頭10位買家更附送埋主角Figure，Game迷當日就要霸定頭位喇。