NBA喺聖誕開波，由於係美國時間嘅聖誕日（即12月25號），所以一眾香港球迷要喺BoxingDay先有得睇；而今年12月26號對於香港球迷可以話正到不得了，因為凌晨1點開始喺「現在台」睇NBA揭幕日，睇到晏晝小休一輪後，夜晚喺「畸寶」又有英超睇；足籃球迷喺呢個拆禮物日絕對目不暇給！
凌晨1點NBA打頭陣
NBA揭幕日戲碼簡直係強到不行了，凌晨1點頭場由今季有真達拿加盟嘅紐約人主場硬撼塞爾特人。之後3點半，勒邦占士、獲特同保殊要上演王者復仇記，向全世界講，熱火上年總決賽輸畀小馬只不過係爆冷；而主場面對熱火嘅小馬今年有幾名主力未獲續約，對住熱火要贏真係高難度過贏上季總冠軍。
大家唔好以為揭幕日會以小馬對熱火作結，因為湖人天王、全宇宙最強得分後衞拜恩，同上季MVP、公牛王牌戴歷路斯都仲未出場！BoxingDay早上6點，各位觀眾可以睇到湖人主場火併公牛，湖人同拜恩今年有心捲土重來，將個總冠軍獎盃帶番天使之城；而另一邊路斯都要力爭上游，重建公牛王朝，所以呢場波絕對唔會比小馬對熱火遜色！
睇完NBA，大家可以唞一唞，到夜晚9點食完飯之後，再返埋電視機前面，因為英超傳統拆禮物日比賽開始啦！今個拆禮物日係名牌主場日；除咗曼城之外，阿仙奴、車路士、利物浦同曼聯，都會喺各自主場迎戰對手。雖然當晚冇強隊互撼嘅比賽，但係車路士將會同富咸上演西倫敦打吡，都可以話係當日嘅重頭戲。
聖誕節目多就預咗，拆禮物日多數都係用嚟休息吓，多數都冇乜嘢做，呢一日可能會好悶。不過，今個BoxingDay可以安坐家中就睇到咁多波，我求大俠都好期待26號呀！