禮拜日兩場英超，兩位領隊哈利列納（左）同奧尼爾（右），一個差啲激死、一個開心死。熱刺作客1:2輸畀史篤城，聯賽6連勝兼11場不敗斷纜，列納賽後話完全係輸喺球證手上。對方係禁區手球唔吹，卡保奧無啦啦攞紅牌，球證呢場波執法水準真係有啲問題，列納賽後話：「我教波30幾年從來都唔會投訴球證，不個今場波要打爛齋缽咯。」同日另一場英超，奧尼爾處子領軍有好開始，新特蘭主場迎戰布力般完場前6分鐘內連入兩球反勝。奧尼爾自然做吓招牌動作開心到彈起，施巴斯坦拿臣上個禮拜射失12碼累球隊輸波，估唔到呢場波即刻喺新波士面前做功臣，補時入波攞走3分之餘，仲幫黑貓跳升上16位，稍緩護級壓力。