歐盟峯會淪為吹水大會，執筆時會議仍無實質成果，德國反對發共同債券，歐豬國家就嫌財政緊縮措施太嚴苛，英國則極力置身事外，搞到上周五個市係咁跌；內地通脹顯著回落，本為利好消息，但分析員極度悲觀，認為係經濟放緩所致，可見信心何其脆弱。
港股以陰燭跌穿10日及20日線，並逐步回補月初的千點大裂口，最後防線為10月以來升軌，現約處18100點，倘再失守，有機出現大跌市。目前推介繼續作細注短打之用，唔對路一定要止蝕，今日介紹半新股青蛙王子（1259）。
青蛙王子主打嬰兒護理用品，有自己品牌，今年7月上市，屬行業龍頭，內地市佔率第二，只係輸畀莊臣及高露潔等外國品牌；上半年賺6962萬人仔，按年升71%，毛利率40.3%。公司處高增長期，並食正內地未來5年的嬰兒潮，潛力可觀。中央經濟工作會議料以谷內需為主，隨着通脹回落，產品定價有上調空間，對盈利有幫助。
近期嬰兒股表現唔錯，好孩子（1086）連日造好，青蛙王子亦由低位勁彈76%，上周五收2.34元，升3.1%，距離招股價2.60元仲有11%水位，可待2.30元買入，目標2.60元，跌穿2.20元止蝕。
魏力