特首曾蔭權「慰問」造成多人死傷的花園街四級大火災民時，向住劏房的年輕傷者問為何不申請公屋？被諷不知民間疾苦。不少月入萬餘元的「夾縫青年」，入息超過申請公屋上限，也無力租買正常單位，無法擺脫危機四伏的劏房生活，更憂心隨時成為下一個火災塌樓的犧牲品。面對侷的生活空間，有人說：「我哋有得揀咩！」；「除咗粗口外唔知點回應特首」。
記者：梁御和 伍雅謙
從新聞報道聽到花園街大火，24歲的阿橙揑一把汗。去年她還居於毗鄰火災現場的一幢舊樓80方呎劏房。「如果我仲住嗰度，應該死咗」。去年農曆新年前花園街也發生大火，她一覺醒來落樓才知大件事。「我住嗰幢樓一梯九伙，一個單位劏成三間劏房，公閘之後每間房仲有鐵閘同木門，根本唔會聽到出面發生乜事。」單位外望天井，發生火警，只有一條樓梯逃生；無路可逃時只可打開窗往天井跳，是生是死，天曉得！
田生送月曆掛大門
今年4月她搬到土瓜灣劏房，一樓是網吧，二樓是一樓一鳳，她住四樓。一個單位劏成六間劏房，月租3,500元，「我好驚唔知幾時有人爆格同打劫」。阿橙大學畢業，現職客戶服務，月入剛過萬元，生活「掹掹緊」。她坦言，租住單位負擔不起，欲申請公屋又不合資格。每月開支扣除水電租金及歸還學費等必須支出，只餘約2,000元飯錢零用，她慨嘆：「根本冇錢剩，唔好話要買樓，要離開劏房，打一份唔夠，咪打多份囉，做你唔死嘅話都可以賺到錢㗎。」
對財政司司長曾俊華曾批評年輕人奢望要住設有會所的新樓，阿橙嗤之以鼻，「政府唔知民間疾苦，住你唔死咪算囉，呢度都好唔安全，石屎剝落緊」。記者採訪當日，以收購舊樓聞名的田生地產送了一個月曆掛在她大閘門口，她苦笑：「真係多謝佢。」
儲首期儲足20年
另一劏房租客小儀居住土瓜灣一個「一劏三」百餘呎套房三年，「父母住緊嗰度連兄弟姊妹有成八個人，大個咗冇可能唔搬出嚟住」。她任職物流公司文員，月入萬餘元，連同水電等雜費，住屋開支最少要4,000餘元，還要兼顧家用，每月有1,000餘元留作基金儲蓄。
選擇劏房，小儀坦言非不得已，「一個舊樓單位嘅月租最少6,000幾蚊，我住唔起。申請公屋又唔輪到我，買樓更加唔使諗」。買一個百餘萬的舊樓單位，首期先付30多萬元，以她月儲千餘元計算，足足要儲20年，「儲到錢啲樓價升晒，仍然係買唔起，曾特首問我哋點解唔申請公屋？我除咗粗口之外諗唔到點樣回應」。
明愛荃灣社區中心社工蘇美鳳指出，夾在私樓及公屋資格之間的青年人，「唔係佢哋揀住劏房，係冇得揀」。她指一般家庭輪候公屋也逾三年，何況單身人士。「等十幾廿年，到中年結埋婚，用另一個身份去排隊囉」。她批評香港作為富庶社會，實無法接受市民要捱貴租輪候逾十年公屋的情況。
阿橙每月開支表
月入：10,500元
強積金：-500元
租金（連水、電費）：-3500元
歸還學生貸款：-2500元
給父母家用：-1000元
三餐飯錢：-2000元
交通費：-600元
電話及上網費：-250元
每月餘款：150元