在多家公司公佈遜預期的第三季業績後，各大券商均大幅下調今、明兩年盈利預測，但瑞信董事兼亞洲（不包日本）中小型證券研究部主管劉紹文直言幅度不夠，預料當大家掌握更多資訊後，將再掀起新一輪大規模盈利下調及降級潮。
他說：「從出口及內需領域企業得到嘅資訊顯示，5月開始走下坡嘅出口定單固然仲係咁差，歐洲相關嘅定單完全無好轉之餘，內需定單亦開始唔得……由於出年農曆新年喺1月，理論上應該喺家入貨，咁樣啲單都係唔得，好得人驚。」
他指根據統計，瑞信有研究的香港中小型股份明年平均盈利預測增幅為15.3%，市場對中國中小型企業前景更樂觀，平均仍然預測明年盈利可錄得約21.5%增長。他相信，按目前定單情況估計，明年整體盈利很難會有這樣理想的增長幅度。
現時情況差過海嘯
劉紹文更認為，由於現時內地生產成本較3年前上升了不少，目前企業所面對的風險，較08年金融海嘯時有增無減。
他說：「雖然廠家兩次同樣都係面對生意大減嘅難題，但因為上次各國好快聯手救市，所以上次啲定單只係好快咁大跌，但又好快咁回升番……今次就好唔同，好似溫水煮蛙咁，唔聲唔聲慢慢咁殺埋身，跌咗成半年，至弊又見唔到盡頭。」
「過去3年內地人工每年升成十多個巴仙，雖然近排原材料價格跌咗唔少，但整體嚟講，家生產成本都高過08年好多，生意跌，成本升，產能又多咗，結果咪係毛利率收縮囉……啲細廠喺年中開始執笠，情況可能會持續到出年4、5月。」劉紹文說。