據左丁山所知，中環有三間江浙人士會所，就係萬年大廈嘅蘇浙、南華大廈嘅上海總會，業豐大廈嘅寧波同鄉會，規模似乎係上海總會較大，起碼有三層樓係自置物業，零銀行按揭負債，唔怪得收會員只收入會費，月費全免。三間會所都主要係吃飯會所，淮揚菜主打，喜歡者自然喜歡。
江浙人有三間會所，仍然意猶未盡，後日獲頒中文大學榮譽博士學位嘅江浙幫證券、黃金大老李和聲老先生早前寄來一張表格，囑左丁山申請入會，新會叫做「浙江軒」，設於駱克道300號僑阜大廈二至三樓。左丁山走上去睇吓，內裏有介紹，原來有二十五位浙江鄉賈，以李達三博士始創會長為首共二十五人，籌集資金一億餘元購置物業，設立獨立會所餐廳，名為「浙江軒」。二十五人包括李達三、李和聲及公子李德麟、包陪慶、顧家麒、車越喬、曹其鏞、王緒亮、范思浩等等。佢地認真慷慨，辦個會所都可以閒話一句，斥資逾億元，唔到你唔服。中國人鄉土觀念之重，直情係深層次。
既然落到灣仔浙江軒，就益埋建築邦，叫佢行過嚟食飯，佢本來就好鍾意到上海總會嘅，依家知道佢寫字樓附近開咗間浙江軒，好不開心，即刻上嚟，點一個鱔糊，試完之後，佢話與上海總會水準差唔多，以後要食小籠包唔駛塞車上中環。
李達三會長已經九十歲過外，多年前獲中大榮譽博士，最近又得到母校上海復旦大學頒授榮譽博士學位，非常開心，至於新科博士李和聲會長已年逾八十，仍然精神奕奕，比左丁山更有睇頭。上海總會多長壽長者，幾年前理事會為九十九歲嘅邵爵士預祝一百歲，主家席中最年輕嗰位係六十後，被稱為小弟弟，因為其他人係九十後、八十後、七十後，而且位位一站起身就可以唱番幾句京曲，不用米高峯已可全場聽得好清楚。最近有上海崑劇團來港演出，上海總會有份贊助，實在係好自然嘅一回事。上世紀五六十年代嘅著名歌星/明星葛蘭係上海總會票友嘅中堅分子，聽佢唱京曲，回憶佢嘅舊歌「我要飛上青天」，別有一番味道。