真係替阿振英擔心，不少人本來對佢衝閘參選有好感，至少比上次煲呔鬥袋巾可觀，但兩個月發展下來，變晒味，越跑越唔對路。糾集一班建制Loser，怨氣冲天，一旦當權，呢種心態下執政，都幾令人擔心，隨時海瑞清官上身，動輒以理殺人，以改革正義大旗，大搞運動，教改前車可鑑。雖云飯焦表態唔會加入下一任政府當官，但教改急風暴雨、目空一切，以為自己手執正義大旗的思維模式，先至係得人驚，至於日後邊位出任教育局局長並非焦點所在。
董朝之施政毛病，乃王安石上身，認為香港問題叢生，深層次矛盾無處不在。本地左派一直對香港有一種負面思維，人辦是工聯嫻姐，佢人係好人，但對香港斷症錯晒。當年阿松言聽計從搞本土經濟做小販市集，最終失敗收場。整色整水OK，但真係做到振興經濟效用就得啖笑。
盤點老董八年之禍
今時今日，公眾已忘記大量老董年代留低的「遺產」，不如請審計署做一次全面衡工量值，包括九龍塘又一城甲級商場旁邊那座創新中心Innocentre、柴灣為年輕人Startup而設的幾億青年中心、科學園三期效益，未計代表作數碼港。老董多年干預主義的後果，有冇人作一次盤點。
今日兩位候選人都借80後社運、貧富矛盾否定煲呔，表面的確可以討傳媒歡心。假如我哋對老董八年之禍唔做總結，日後唐梁任何一人當政，如何抵抗各式各樣來自建制內商界、工會干預主義的誘惑？一定死梗！
重回舊路冇得怨天
我擔保7年之後，又再重演一次高科技產業轉型、振興本土經濟。既然煲呔任內留低大把錢，唔用就笨。亞洲金融風暴香港係最後先至復蘇，尤其係科網泡沫爆破那段悲慘日子，絕對係人禍，並非外來天災。
今日樓價重回97高峯，以香港人善忘性格，重回老董舊路，只係時間問題，今次，冇得再怨天尤人了！
添馬男