選委開票有人歡喜有人愁。
泛民區選失利後哀兵上陣，外邊冇人睇好，結果成功保住上屆票倉，法律、教育、會計、社福及IT都係橫掃，加埋立法會當然席位，要攞150提名票，絕無問題，而且超額完成。可能有挺唐建制派寧願泛民贏凸，好過畀振英陣營選委勝出。
唐唐須攞盡選票
泛民今次佔有利陣地，可攻可守。攻者乃保送一位候選人正式參戰，將小圈子選舉盡量假戲真做，變成一次面向巿民的民意戰；守者乃當振英同時夠票入閘的話，泛民要全力綑綁選委，變成談判籌碼，這近200票係有左右大局的能力。因為選舉特首係投暗票，建制中人要投向振英，好難追查，中央黨鞭鞭長莫及。在暗票不明朗情況下，唐唐必定要攞盡選票。若3人入閘，泛民絕對有更大政治談判空間，提出政治訴求，包括下屆政府施政承諾，及建制內政治資源分配。
但以泛民派系山頭林立，人人有自己算盤，要走上現實政治談判之路，擺脫阿Q式道德精神勝利法，難係難，但不妨放手一博，因為冇乜Downside。要走這步，令三國局面出現，先要保送振英夠票上壘。泛民提名票係有凸章，至少凸咗40票，無謂嘥咗。目前振英已陷入苦戰，在政協得票差不多屬包尾，其政治含義呼之欲出。加上爆出廖暉幕後操盤撐唐唐新聞，同時振英到訪壹傳媒大樓同社長楊懷康握手照刊出，振英陣營篤背脊嫌疑連鏹水都洗唔清。
挺梁飲食界全軍盡墨
佢在建制派內要攞公開提名票好難，工商界以挺唐派佔壓倒性，專業界則泛民佔優，振英只在工程、建築測量及會計有些少票，事前寄望甚深的飲食界全軍盡墨，會計界陳茂波操盤挺振英的兩條名單，15人只有4人贏出，對家挺唐A16名單16人中勝出15個，泛民10人名單贏出9個，振英真該煨！
既得利益主流全線支持唐唐。第三第四組別漁農、勞工、文化宗教及原政界乃中央鐵票部隊，除非西環同港澳辦有嚴重分歧，否則要撬走鐵票難度比撬泛民票更高。
振英能否入閘的懸念，在於西環鐵票如中醫、漁農、勞工會否調撥予振英，及泛民有否務實戰略，實行與狼共舞作戰計劃，製造孫劉聯手對抗北方大敵曹操，創造原本不存在的政治空間。但以泛民及鐵頭仁之作風，都非權術戰略家；睇怕最後又係求仁得仁，贏到選委票都冇實際效用。
添馬男