中銀監前主席劉明康（圖）退休唔夠一個月，已經有去向。內地媒體報道，佢將會南下廣州，出任中山大學嶺南學院名譽院長兼教授，明年春季開學，佢就會喺遠離中國金融中心嘅嶺南象牙塔，專心講授國際金融監管課程。
掌中銀監歷盡鬥爭
官員退休後，一般會以顧問名義退居二線。歷任人行同三大銀行嘅劉明康，03年沙士時臨危受命，出掌中銀監，係第一任主席。佢大膽改革中國銀行業，推行最辣手嘅政策，開放外資銀行喺內地經營限制，因此引嚟行內人不滿，批評佢做事不顧後果。
8年間歷盡鬥爭，經常同巨大嘅市場阻力過招。家陣退休作育英才，唔揀曾經兼職教授、位於皇城之內嘅頂級學府北京大學同清華大學，去到山高皇帝遠嘅廣州學府，唔知同厭倦官場是非爭鬥有冇關。