結咗婚之後淡出幕前嘅張燊悅，最近同新任爸爸黃浩然接拍咗個奶粉廣告賺奶粉錢，張燊悅仲帶埋差唔多3歲嘅大女Lily同14個月大嘅細女Lucy首次一齊拍廣告。拍攝當日，張燊悅要帶住兩個女去街市取景，當時張燊悅用抱帶抱住細女，一手拖住大女，另一隻手就揸住大袋細袋，做咗靚靚媽咪嘅張燊悅果然體力十足。
講到湊女，張燊悅話最鍾意用活動教學：「我平日除咗兼顧碩士課程之外，閒時都會同囡囡一齊感受生活。畀佢哋感受吓街市嘅氣氛，都算係遊學之旅，又可以做個榜樣，畀佢哋知道事事都要親力親為。」
黃浩然煮飯減壓
黃浩然就冇帶埋8個月大嘅囝囝Kayden拍廣告，不過佢就大騷廚藝，樂做煮飯公嘅佢話：「下廚係最好嘅減壓方法，我之前對煮飯一竅不通，因為太太教路，家就愛上煮飯。」
