財經記者轉行，通常離唔開跳去財經公關公司或者投資銀行，轉行做上市公司主席或者董事嘅真係唔多，但啱啱完成收購新華電視亞太台嘅進業控股（8356），就一次過帶挈三位新華社前記者做上市公司董事。
接任上市公司主席
話說進業由渠務及道路工程公司，搖身一變成為涉獵傳媒嘅企業，除計劃將公司名改為「中國新華電視控股有限公司」，同時重組董事會，集團創辦人簡國祥退任，由財經版出身嘅新華社總編輯室副老總吳錦才接任主席，新華社主任記者鄒陳東同主任編輯吳旭紅，分別任行政總裁同財務總監。
呢三位「行家」，之前擔任中國新華新聞電視網董事，成為進業執行董事再做埋主席、CEO同CFO，都算順理成章。不過，貴為董事，三位「行家」年薪都係得萬二蚊，只係稍為好過初入行嘅記者！