市況淡靜，唔好講話買股，連大行推薦股份，亦唔似得以前一推識「郁」，不過正所謂齊心就事成，只要夾啱時間一齊做嘢，就算如今年潛到落谷底的航運股，亦可以由死股變番生。上周三，四間大行齊齊出報告唱好航運股，中海集運（2866）、東方海外（316）等股價單日抽高一成，成為全日最強。
業績期前後或有收購等消息，大行齊出報告絕不出奇，奇就奇在，航運股近排新聞水盡鵝飛，不利消息又多，德銀6號搞咗個東方海外飯局，分析員食完後第二日即刻出報告，滙豐2號都搞咗個航運業嘅投資者飯局，但就等到7號先出，連同瑞信及美林同日出，你話咁啱得咁蹺，我就話四位分析員簡直是心有靈犀，默契非常！
首予報告（InitialReport）亦是大行齊齊發功的最好機會。以6月上市的新秀麗（1910）為例，7月三間保薦行已經相約在27號一齊唱好，同日首予增持或買入，目標價19至20元，股價當日立即異動飆6.6%。
大行叫好 宜過濾
不單止大行約時間出report，就連傳媒亦經常在PR事先通知下「夾日子」出稿，目的要製造全城效應，吸引最多讀者注意。近排印象最深刻要數Prada（1913），十月Prada帶財經記者豪遊意大利總部，參觀生產工場，及後10月17日，十份主要本港中英文報刊，同日作出大篇幅報道，股價當日急升6.2%或2.1元，以總股本25.6億股計，單日市值進賬超過53億元。
講宣傳，真係好過賣十版全版廣告，對股價作用，亦勝過十位財演賣力唱好。假設每位使費十萬計數，隨時賣兩、三個袋已經返哂嚟，認真高招！
海外筍trip可遇不可求，現時公關公司搞trip，十居其九都是返大陸睇廠，而且行程短則二日，趕頭趕命，朝早搭飛機，下午睇廠或睇工場，晚上同管理層吹吓水食餐飯，第二日已經byebye返香港。股榮亦寫過不少睇廠報告，上司曾問我，點解份稿有讚無彈？我心諗，人哋知你成班記者嚟，當然畀最好嘅一面你睇，講前景亦吹到天花亂墜，而行程緊密，你想明查暗訪，偷偷走出去都幾難。
有個基金經理亦曾詢問，點解友刊壹仔經常做到踢爆造假企業，但他每年探訪超過50、60間公司都未有發現不妥。道理其實跟記者睇廠團一樣，難道人家會暴露短處給你睇嗎？玩踢爆，先決條件是不讓對方發現。
無論大行或傳媒同日出報告及報道，即日反應通常是正面，但投資者或讀者要小心，跟這類消息買貨，往後表現多差強人意。如3月及7月昆侖及新秀麗推介至今，股價反而跌14%及35%。大家以後見到大行一齊叫好，或一眾傳媒越洋訪問，請過濾一下。
股榮
