曼聯上周歐聯輸波，分組賽階段就被淘汰出局，係6年來最差的表現，整季收入大跌難免，睇怕未來一年可能都再難以搵到合適的上市Window，除非班主格拉沙家族願意大幅度減價。
曼聯3個月前因為市況差，擱置咗新加坡IPO計劃，曾經有份幫曼聯安排上市的中環賓架同我哋講，暫時未有再啟動IPO的時間表，如今紅魔在歐聯提早出局，損失巨大，盈利肯定急跌，亦反映球會收入甚為波動，曼聯IPO要捲土重來，確實更加難Sell，估值相信要相應下調，問題係格拉沙家族願唔願意。不過由於曼聯有減債需要，可能唔到格拉沙家族惜貨。
歐聯出局 跌咗2.8億港銀
紅魔近年的歐聯戰績其實十分出色，2006/07季度打到入四強，之後連續3個球季都入到決賽，攞咗一次冠軍，表現之佳，可以話係僅次於地上最強的巴塞。
2010/11季度雖然輸畀巴塞，但有份踢的場數同巴塞一樣，整個歐聯賽程的門票、獎金、轉播等總收入，曼聯超過5300萬歐元，折合港元近5.5億元，仲多過巴塞的5100萬歐元，係收入最高的歐聯戰隊。
歐聯收入肥仔，曼聯截至今年6月底止的全年經營溢利1.1億英鎊（13億港元），係歷史新高。但係因為揹咗4.6億英鎊（56億港元）債務，債務的利息開支要成4500萬英鎊（5.5億港元），稅前盈利得返2970萬英鎊（3.6億港元）。
歐聯近年已經係曼聯主要收入來源之一，如今提早在分組賽畢業，要轉戰歐霸盃，收入根本冇得比。同上季入到歐聯決賽比較，曼聯今鋪估計損失最少2300萬英鎊，即係跌咗成2.8億港銀，隨時將全年盈利一筆勾銷。
《中門大開》添馬男上周盛讚的專欄作家SimonKuper，3個月前都有論及曼聯上市估值，佢話格拉沙家族大想頭，為求盡量抽多啲水，集資10億美元，整個球會估值想去到30億美元，係去年利物浦收購價的7倍，好多人都唔覺得曼聯的價值應該7倍於利物浦。
曼聯一年要畀成四、五千萬英鎊利息，多過費格遜用嚟買球員的開支，限制咗費Sir買人的預算，雖然曼聯過去成功非因出手夠豪，但係Kuper指出，數據顯示球隊成績與班費，尤其是球員薪金，有莫大關聯。
搵單一投資者 或要棄控股權
在「筆直」有限下，曼聯不高價買人，現在的球員薪金開支，低過曼城同車路士，目前以朗尼為首的隊伍，係19年來第二年輕的紅魔，雖然今季聯賽開首多場表現搶眼，8比2大勝阿仙奴，畀人覺得紅魔所向披靡。但如此年輕的隊伍，在多條戰線全面鋪開後，有冇經驗和能力兼顧，就令人懷疑。
Kuper真係開口中，曼聯小將後來在主場被曼城KO，現在落後曼城兩分，漸被拉開，歐聯同聯賽盃又已告畢業，一個唔好彩，今季隨時四大皆空。
因為想確保對曼聯的絕對控股權，格拉沙家族捨棄香港，將曼聯轉到容許有A、B股結構的新加坡上市，此舉原本已經會影響估值和IPO銷情，如今又遭遇收入急跌之窘，IPO變得更遙遙無期。有投資銀行家預言，財力有限的格拉沙家族，另一個選擇，係放棄曼聯IPO計劃，尋求單一投資者入股，中東或東南亞富豪，願意畀溢價收購英超心頭好，問題係佢哋肯定要買入控股權，唔可能要B股，咁就要睇格拉沙是否願意割愛了。
