即使大家未親身見過OrangeVan，相信大概知道呢架可愛方形麪包Van有幾大吸引力！若然OrangeVan再變身，加個大尾斗，Cute爆程度爆晒燈，揸出街一定唔憂無女撲埋身，號召力絕對強，但要馴服它絕對不是易事。
記者：許維雅
攝影：劉永發
Model：SoSo@GME
揸車靠大力
今年36歲，出世紙上寫着1975年的Doka確實已一把年紀，馬力難求，幸好依然有心有力帶到我們上飛鵝山，不過Doka開動時的嘈吵程度加上高車身的搖晃，感覺好似坐船一樣，十分搞笑。其實今次遊車河不只辛苦了Doka，亦難為了車主Joe哥，因為見他大大力舞動無風油軚的大軚環，都幾吃力，再看他踩極力子入波，感覺好似揸七十年代的巴士一樣。不過，正宗好睇唔好食的Doka，相信亦無損車迷將之珍藏的決心。
大把人爭住買
經常有留意入口古董車的車迷，可能會覺得OrangeVan（即是VolkswagenType2）並不是甚麼新奇車，但今次呢架卻多了個約七呎長的大尾斗，相信好多車迷都會大叫「嘩」一聲！這部「橙溝斗」小貨車莫講話於香港極之罕見，就連帶它來港的Joe哥亦話唔容易，「當知道喺英國有呢部車，已經二話不說拍板話買，點知有十幾個鬼佬同我爭，所以惟有鬥快鬥價高先可以搶到，至於幾多錢就無謂講喇！」
T2Pickup又名Doka
50年代出產的VWType2當年盛極一時，其後亦陸續推出了不同變種版本，如PanelVan、Kombi及SambaBus等，而這架將長長車尾換上載貨尾斗的，就叫T2FlatbedPickupTruck，於德國又名Doppelkabine（簡稱Doka）。芥辣黃色的巨型車身，以方形麪包車頭、一對大圓頭燈的造型出現，其實已吸引不少途人目光，加上米白色的車頭泵把、防撞架及方形小側鏡配襯，令可愛外貌更加滿分。當年為增強實用性換上的尾斗同樣感覺原汁原味，木條地台及手動式開合的三邊圍板都令模特兒SoSo大讚有趣。
操控猶如揸巴士
Doka除外形出位，就連車門及內櫳設計都別樹一格，三車門有兩大一細，一隻可以180度打開的迷你車門用作上落後排座椅；米白色方形盒子車廂雖然簡陋，但空間又高又闊，且還保養得不錯。兩排舊式設計無頭枕的米白梳化椅襯上淺啡色地毯，感覺如走回70年代。至於中控台的構造及陳設都十分LowTech，加埋一個大圓形金屬軚環、一條又長又幼鐵枝襯上橙色的波棍，懷舊味道滿瀉。SoSo跳上司機位左摸右搞玩軚環時，就好似小女孩坐在入錢玩具車一樣興奮。
VWType2Pickup
引擎：2,000cc水平對向
馬力：約68匹
傳動：四速手波
查詢：23641666（MiniPit）
