睇港股技術走勢，再度受制20周線19191關鍵阻力，中線續睇淡。雖然晉佳覺得會跌穿萬六，但家適逢政治市，最好見步行步，暫時睇千點大升市嘅起步點萬八先。
睇番A股遠遠跑輸美股，真係大條道理。內地地方政府融資同民間借貸問題，出年初分分鐘再爆；巴西早前向世貿組織提出人民幣滙率申訴，出年上半年決定會唔會懲罰，如果告得入中國，就真係爆發貿易戰。加上早前美國國會專家小組評估，未來5至10年人民幣對美元嘅挑戰將加大，最近美國就出動國務卿希拉里去巴結緬甸，擺明想連結埋越南、柬埔寨，他日為美國、日本提供低成本勞動力，長遠就可以Corner中國。睇嚟A股都會繼續弱，難怪外資頻頻㩒錢走人。
講咁多，一嚟係想大家知港股有幾多隱憂；二嚟係叫大家唔好一味睇好中資股長遠前景。晉佳相信美國概念股中短線應可勝過中資概念股，起碼呢個諗法符合近期股價走勢。
睇利豐（494）低位形成盤形，技術走勢極靚，大家之前點數臭佢都好，買貨嘅都唔係儍。之前美國BlackFriday銷售好到不得了，你可能質疑美國人家只有錢買平嘢，但利豐銷往美國嘅產品唔見得好多奢侈品，相信唔會對利豐有乜負面影響。
內地多隱憂美國概念秤先
近期淡馬錫發行利豐零息換股債，行使價溢價超過4成，2013年到期，聽聞市場反應唔錯。如果你買咗呢隻債，再以超低息抵押出去，就等於俾平息去揸住利豐遠期Option，除笨有精。淡馬錫用得高溢價去發債，一嚟覺得利豐換股債有需求；二嚟係太低價唔捨得沽，未必係睇淡利豐。
大市家風頭火勢，利豐股價表現好難講，但如果認為年底前港股會反彈，利豐係較好選擇。家9RSI落到中軸附近，近排響40左右見支持，預料唔使跌穿15元（11月25日至12月7日升勢嘅黃金比率0.618倍）。
如果跌穿咗，強勢未必維持，所以等股價喺15元以上出現承接力先買，目標價19元，直插穿15元就免問。如果有貨，穿15元點都走啲先，上一個短線低位13.80元係終極止蝕位。
晉佳
本欄逢周一、三及五刊出