講食肆「有星無星」，一位讀者來電郵指左丁山經常話到鏞記四樓，唔去地下，言下之意，就係左丁山不識平民化。鏞記地下在午餐時份，人流之多，與翠華茶餐廳相若，不設預訂，難以搵位，左丁山故此唔去，並非不夠平民化，自己食早餐都只係買個雞尾包或菠蘿包啫，未試過去文華酒店食早餐或好似特首候選人搭地鐵時對記者講：自己會搭地鐵，去半島酒店食早餐！幾位朋友在十二月四日中午十二時左右睇有線電視直播，聽到呢句說話，不禁讚嘆候選人有品味，去半島食早餐噃，亦夠聰明，朝早從山頂去半島，塞車會塞到過晒鐘，搭地鐵就真係醒！好多年前左丁山在尖沙嘴地鐵站等車，碰到信和大股東黃志祥，又碰過一位特首候選人嘅爸爸唐老先生，佢地兩位點解唔坐私家車去中環？兩位都話：費事塞車啦。
黃昏繁忙時間搭地鐵去半島食自助餐最方便，西式與日式皆宜，星期五晚上慢慢嘆無以尚之。半島魚翅反為冇咁出名，專登要食魚翅之食客，大概唔會去半島，故此半島宣佈以後不售魚翅，只係為咗宣傳，並無甚麼營業損失。禁售魚翅一事，鬧到全世界華人好似係罪犯咁樣，多倫多有激進動物權益保護團體宣稱要向華人食肆報復（因華人反對禁食、禁售魚翅），不排除有種族仇視成份，佢地咁保護動物，又唔見佢地去反對加拿大人捕殺海豹、食海豹肝，法國人食鵝肝，俄羅斯人好魚子醬，又唔見禁售、禁食鵝肝、魚子醬？
一位出席國際海產會議多年嘅海產L對左丁山講，聯合國批准可捕吃之鯊魚有四百四十餘種，又明令規定不准捕殺鯨鯊與姥鯊（天九翅），歐洲人每年耗用鯊魚肉達十幾萬噸，製作魚肝油、魚油、鯊魚骨等等，漁人將鯊魚翅出售到亞洲，只係當作副產品，不浪費而已，有何殘忍可言？唔通要漁民殺死鯊魚後，批掉魚翅掉落海洋乎？海產L指環保團體不求甚解，胡亂指責華人食翅不文明，有隨着西方笛子起舞之嫌！那麼為何有紀錄片顯示漁人對鯊魚剝翅之後拋鯊魚落海？海產L話紀錄片來源不明，此乃非法行為，正當漁民唔會做，亦冇咁笨，環保團體不應以偏概全！