英皇證券（717）跌到近上市低位，兩個字：「抵搞！」英皇證券啱公佈2011年度（9月底止）業績，喺港股橫風橫雨底下，純利只係跌14%，到6200萬銀，有晒交代。而集團跌到現水位，現價（0.25元）PE得5倍幾單位數；又以2011年度每股派息計，息率高達5.5厘，已經好吸引。隨住呢潮金融市場暴風雨過去，加埋阿爺逐步放水，英皇證券業績turnaround，恢復增長，預期PE及息率回報，應該仲吸引。又英皇證券手頭淨現金過6億銀，每股淨現金，同現價差無幾，現金牛有番咁上下防風力。而集團現價NAV折讓47%，證券同業中，呢個折讓水平，亦算吸引。收集英皇證券，擺中線，係咁意博上返NAV0.47元，現價係咁意要升88%。
卜蜂國際業績靚
卜蜂國際（043）2011年半年度（6月底止）純利增長25%到5億，已經好靚仔。集團主打祖國動物飼料項目，喺肉食呢類必需品嘅持續性需求下，長做長有。加埋新購入越南動物飼料產品及禽畜業，對卜蜂全年度業績，如虎添翼，有機翻半番到15億銀。短打博卜蜂升20%到1.13元，預期PE不過12倍幾。
錢雋