咪以為喺全球第四高嘅環球貿易廣場（ICC）返工好盞，瑞信細價股揀股王劉紹文話，十足日日去登高。
話說劉紹文家住西灣河，由於返工時間早，唔塞車，所以日日揸車返工，點對點半個鐘就到。不過近排扭親腳冇揸車，改坐港鐵，噩夢就開始，沿途嘅自動電梯條條都鬼死咁長，由港鐵站行去ICC要成15分鐘，跟住仲要坐雲端升降機先上到88樓office，搞到由屋企返公司要成45分鐘。
佢仲呻，入行做分析員廿幾年，都係第一次喺九龍返工，平時做分析同見公司就冇問題，但要同大fund見面或者搞小圍研討會就大鑊，要去返中環，成日時間咁就冇咗。