11月份樓市久沉不起，又臨近年尾有提早收爐之格，叠埋心水留定錢下個月交稅，但此刻忽然想起無可能整個月樓市都冇變化，老樓打電話請教師傅，師傅最後留下四個字：「好自為之」。
我這位師傅投資地產30年，擁有10億資產，由買細樓開始，有錢就買樓收租，收到租金又買樓，根本毋須找銀行做按揭，買樓致富經驗豐富。他認為以前買樓好講「Location、Location、Location」即係位置，豪宅買港島南區或山頂；細價樓揀交通方便的港島東區多個鐵路沿線大型藍籌屋苑，貪其走位靈活性高兼可以收租。
待市況逆轉假豪宅現形
但是當買家來源起了變化後，這個傳統出現很大的改變，對住啟德爛地賣每呎1萬元、堆填區隔籬又要賣每呎6000元，最離譜是新界對住大臭坑渠竟然賣每呎2萬元，完全忽視了地區最主要元素，根本唔值呢個價，因此個市先至大上大落。「不是很多樓望到維港景，都賣每呎2萬」，這完全是發展商為了公司盈利，將醜女包裝為貴婦吊高嚟賣，實質未夠班。
他分析，現時市場過份集中物業投資，諗住可以保本，但是缺乏成熟社區配套，新開發區起碼要經過10餘年持續發展先至成型，發展商話多條港鐵後，樓盤升值潛力升，有無諗過每朝逼港鐵返工嗰種痛苦，到時先至後悔，層樓又賣唔出，所以從來都是買市區樓。
「新界賣每呎1萬、太古城要賣每呎2萬先啱數」。無理由將軍澳都要賣1萬元，家太古城都係賣呢個價咋。單從兩區租金仲差五成便知道龍與鳳。
究竟樓市會點發展？師傅話全球欠資金、皆因全球莫水，所以多水就話事，現時樓市調整未夠深，當經營環境逆轉時，就會向債仔要求回水，好多過度借貸或是超賣價的假豪宅即刻現形，才會推低樓市，當二手成交多了平價貨，那時專吼超筍樓王級數樓都未遲。
劉兆昌
http://www.HKLau.com